Дар доираи созишномаҳои байнулмилалӣ Қазоқистон ба шаҳрвандони Тоҷикистон ҷиҳати таҳсил дар мактабҳои олии ин кишвар беш аз 90 грант ҷудо мекунад.

Бино ба маълумоти ВАО-и Қазоқистон бо истинод ба намояндаи Вазорати маориф ва илми ин кишвар, имсол ба мактабҳои олии Қазоқистон қабули беш аз 90 - нафар аз Тоҷикистон, 4 нафар - аз Қирғизистон, 20 нафар - аз Чин, 1 нафар - аз Муғулистон, 1 нафар - аз Украина, 3 нафар - аз Беларус, 1 нафар - аз Миср ва 46 нафар довталабон аз Афғонистон дар назар аст.

Намояндаи Вазорат гуфтааст, имсол миёни ҳукуматҳои Тоҷикистон ва Қазоқистон созишномае ба имзо расидааст, ки мутобиқи он аз соли 2017 шаҳрвандони кишвари ҳамсоя дар шуъбаҳои омодагӣ нахонда, метавонанд дарҳол барои таҳсил дар курси аввали мактаби олӣ довталабӣ кунанд.

«Ҳамасола барои шаҳрвандони Тоҷикистон 100 ҷой ҷудо мегардад. Имсол аз 93 шаҳрванди Тоҷикистон, ки шуъбаҳои омодагиро хатм карданд, 77 нафарашон дар санҷиш барои довталабон иштирок карданд. Аз Вазорати маорифи Тоҷикистон боз барои қабули 20 шаҳрвнади дигар роҳхатнома расид. Ҳамин тариқ, соли 2016 ба мактабҳои олии Қазоқистон қабули 97 нафар тоҷикистониён дар назар аст», - афзудааст номбурда.