Прокуратураи генералии Тоҷикистон изҳор мекунад, ки шаҳрванди дар фурудгоҳи шаҳри Кишинёв (Молдова) тирпароникарда ба бедарак шудани муовини раиси “Ориёнбонк” Шуҳрат Исматуллоев даст дорад.
Дар изҳороти ин ниҳод гуфта мешавад, шаҳрванди Тоҷикистон Рустам Ашӯров, ки пас аз тирпаронӣ боздошт шуд, яке аз аъзои гурӯҳи муташаккили ҷиноӣ мебошад.
“Баъди содир намудани ҷинояти мазкур тавассути Туркия бо мақсади ба кишварҳои Иттиҳоди Аврупо фирор намудан ба Молдова парвоз намуда, ҳангоми убури сарҳади Молдова ва ҳаракати дастгир намудани ӯ, номбурда таппончаи яке аз кормандони мақомоти ҳифзи ҳуқуқи фурудгоҳи шаҳри Кишинёвро гирифта, ду нафари онҳоро ба қатл ва якчанд нафари дигарро гаравгон гирифтааст”, - омадааст дар хабар.
Ба иттилои манбаъ, ҳангоми гузаронидани амалиёти зиддитеррористӣ Рустам Ашӯров ярадор ва дастгир шудааст.
Прокуратура хабар додааст, ки Рустам Ашӯров сокини 43-солаи шаҳри Душанбе мебошад. Аз дигар ҷузъиёти ҳодиса хабар дода намешавад.
Дар ҳамин ҳол, тавре ки Focus.ua бо истинод ба шабакаи Telegram-и Ungureanu 112 хабар медиҳад, марди 43-сола, ки дар фурудгоҳи Кишинёв рӯзи 30 июн тирпаронӣ кард, аз ҷониби Интерпол барои куштори “шахси бонуфуз” мавриди ҷустуҷӯ қарор дорад.
Гуфта мешавад, Рустам Ашӯрови 43-сола шаҳрвандии ду кишвар - Тоҷикистон ва Русияро дорад.
Ҳамчунин зикр мешавад, ки ҳангоми рух додани ҳодиса ду марди дигар ӯро ҳамроҳӣ доштаанд, ки ҳозир ҷустуҷӯ мешаванд. Мақомоти маҳаллии пулис ба ҳолати омодабоши ҷангӣ оварда шудаанд.
Шабака сурати эҳтимолии Ашӯровро нашр кардааст.
Рӯзи 30 июн дар Фурудгоҳи байнулмилалии Кишинёв як мард ҳангоми гузаштан аз санҷиш дар сарҳад тирпаронӣ кард.
Сарвазири Молдова Дорин Речан дар саҳифаи худ дар Facebook хабар додааст, ки шахси тирпаронида шаҳрванди 43-солаи Тоҷикистон мебошад. Аз лиҳози амниятӣ вуруди ӯро ба Молдова рад кардаанд.
Ҳангоми раҳнамоӣ кардан ба “минтақаи озод”, ки аз он ҷо мард бояд хатсайри бозгаштро интизор мешуд, ӯ таппончаи хидматии намояндаи пулиси сарҳадро гирифта, якчанд бор тир мекушояд.
Ӯ ба сӯи сарҳадбон ва корманди фурудгоҳ, ки мехост силоҳро аз дасти мард гирад, тир мепаронад.
Ҳам сарҳадбон ва ҳам корманди фурудгоҳ ҳалок шуданд.
Ба аъзои воҳиди таъиноти махсуси “Молния”, ки ба ҷойи ҳодиса ҳозир шудаанд, муяясар мешавад, ки ӯро безарар гардонанд. Ӯ захмӣ мешавад.
Корманди сафорати Тоҷикистон дар Киев, ки кишвари моро дар Молдова низ намояндагӣ мекунад, ба ТАСС хабар додааст, ки намояндагии дипломатӣ аз ҳодисаи тирпаронӣ дар фурудгоҳи Кишинёв огаҳ буда, пайи дақиқ кардани маълумот дар бораи ҳамлагар аст.
“Моро аз ҳодисаи фоҷеабор дар фурудгоҳи Кишинёв огаҳ карданд. Айни замон мо маълумот дар бораи шаҳрванди боздоштшударо дақиқ мекунем.Ҷузъиёти бештарро баъдан пешниод хоҳем кард”, - гуфт намояндаи сафорат.
Мақомоти прокуратураи Молдова дар бораи содир шудани амали террористӣ парванда боз кардааст.
Президенти Молдова Майя Санду ба оила ва пайвандону наздикони ҳалокшудагон изҳори тасаллият намуда, зикр кардааст, ки хадамоти махсус дар саросари кишвар ба ҳолати омодабоши баланд оварда шудаанд.
Иҷрокунандаи вазифаи прокурори генералӣ Ион Мунтяну изҳор доштааст, ки ба ин марди ярадор ва боздоштшуда барои куштани ду нафар ҳукуми ҳабси абад таҳдид мекунад.
Руcский