Ду нишони тилло, як нуқра ва як биринҷӣ самари ҷаҳду талоши ҷудокорони навраси тоҷик буд, ки дар Қаҳрамонии Осиё ба даст омад ва дастаи мунтахаби наврасони ҷудокори кишварро дар қора миёни сегонаи беҳтаринҳо сазовор гардонид. Мусобиқа дар шаҳри Ҷакартаи Индонезия идома дорад.

Нишони аввали тиллоро Мадина Қурбонзода дар вазни то 52 кг ва дар рӯзи аввали мусобиқа ба даст овард.

Мадина Қурбонзода то расидан ба марҳилаи ниҳоӣ ду ҷудокор аз Қирғизистон ва Ҳиндустонро шикаст дод.

Дар марҳилаи ниҳоӣ бо Нигина Умирзакова аз Ӯзбекистон вориди рақобат шуд ва ғалаба кард. Ҳамин тавр, Мадина Қурбонзода аввалин нишони тиллоро барои дастаи Тоҷикистон овард.

Ин нишони тиллои ӯ ҳамчунин аввалин миёни бонувони кишвар аст.

 

Мадина Қурбонзода

Дар рӯзи дуюми қаҳрамонӣ се ҷудокори тоҷик вориди рақобат шуданд.

Рошид Неъматов дар вазни то 73 кг даври аввалро озод паси сар карда, дар даври ҳаштякниҳоӣ Кадек Дви Виная аз Индонезия, дар даври чаҳорякниҳоӣ Субҳон Ҳакимӣ аз Эрон ва дар даври нимниҳоӣ Игор Криволапов аз Қирғизистонро шикаст дода, ба финал баромад.

 

Рошид Неъматов

Дар финал ӯ бо Бобоҷон Шарофови ҳамватанаш вориди рақобат гардид. Бобоҷон Шарофов то ин марҳила даври аввалро озод паси сар намуда, дар даври ҳаштякниҳоӣ Тсу Яо аз Тайбеи Чин, дар даври чаҳорякниҳоӣ Даулеткерей Казсейфил аз Қазоқистон ва дар даври нимниҳоӣ Минсунг Ҷеон аз Кореяи Ҷанубиро мағлуб карда буд.

Дар рақобат барои нишони тилло Рошид Неъматов ғалаба кард ва Бобоҷон Шарофовро бо нишони нуқра гузошт.

 

Бобоҷон Шарофов

Ҷудокори дигар Абубакр Абдуҷалилзода дар вазни то 81 кг дар даври аввал намояндаи Кувайт Туркю Аленезиро шикаст дода, дар даври чаҳорякниҳоӣ мағлуби Ҷаеюн Сим аз Кореяи Ҷанубӣ гардид ва ба даври тасаллобахш рафт. Дар даври тасаллобахш бар намояндаи Ӯзбекистон Камронбек Қодиров зафар ёфта, барои нишони биринҷӣ бо Мунгундул Батҷаргал аз Муғулистон рақобат кард ва пирӯз шуд.

 

Абубакр Абдуҷалилзода

Ҳамин тавр, чаҳор ҷудокори навраси тоҷик, ки Тоҷикистонро дар Қаҳрамонии Осиё муаррифӣ карданд, соҳиби нишон шуданд.

Имрӯз, 13-уми сентябр, боз ҳам дар шаҳри Ҷакарта мусобиқа миёни ҷавонон оғоз мегардад, ки кишвари моро 6 нафар Икром Шамсов (-60 кг), Умар Шеров (-66 кг), Муҳаммадамин Лоиқов (-73 кг), Абдулло Лоиқов (-81 кг), Суруш Саломов (-90 кг) ва Мадина Қурбонзода (-52 кг) намояндагӣ мекунанд.

Дар Telegram, Facebook ва Instagram бо мо бимонед.