Душанбе. 9-уми апрел. ОИ «Азия-Плюс» - Хабаргузориҳои Русия бо истинод ба изҳороти мақомоти раҳбарии Ширкати давлатии умумирусиягии телевизиону радиои Русия иттилоъ медиҳанд, ки мақомоти раҳбарии ширкат аз қатъи пахши барномаҳои шабакаи телевизиони «РТР Планета» дар қаламрави Тоҷикистон изҳори нигаронӣ кардааст.

            Ёдрас мекунем, ки ҳукуматдорони Тоҷикистон шурӯъ аз 2-юми апрели соли ҷорӣ бинобар аз имзои шартнома барои соли 2009 даст кашидани ҷониби Русия пахши барномаҳои шабакаи телевизион мазкурро дар қаламрваи ҷумҳурӣ қатъ сохта буданд.

            Тибқи иттилои хадамоти матбуоти Ширкати давлатии умумирусиягии телевизиону радиои Русия, мақомоти раҳбарии ширкат дар давоми моҳи март бо ҷониби Тоҷикистон фаъолона гуфтушунид доштааст, вале 27-уми март ҷониби Тоҷикистон ба онҳо дар бораи яктрафа даст кашидан аз қарордоди паҳни мавҷҳои шабакаи телевизиони «РТР Планета» ва «Радиои Русия» хабар додааст.

            Гуфта мешавад, мақомоти раҳбарии Ширкати давлатии умумирусиягии телевизиону радиои Русия ҷиҳати дубора барқарор сохтани пахши барномаҳои шабакаи телевизионии «РТР Планета», ки қисми зиёди ҷомеаи Тоҷикистон ва аҳолии русзабони ҷумҳуриро бо дастрасӣ ба иттилоот аз Русия таъмин месохт, тадбирҳои зарурӣ меандешад.

            Директори генералии ширкати Русия Олег Добродеев таъкид сохтааст, ки гурӯҳи корӣ таҳти сарварии мақомоти раҳбарии ширкат ҷиҳати ҳалли таъҷилии масъала ва гуфтушунид бо ҷониби Тоҷикистон барои барқарор сохтани пахши барномаҳо омода аст, ба шаҳри Душанбе ташриф биоварад.