Имрӯз, 14-уми октябр дар Душанбе Форуми байналмилалии сармоягузории "Dushanbe Invest-2025" ба кори худ оғоз кард. Дар кори он Эмомалӣ Раҳмон, раисҷумҳури Тоҷикистон иштирок ва суханронӣ кард.
Он зиёда аз ҳазор иштирокчиро аз кишварҳои гуногун гирдиҳам овард. Гуфта мешавад, ки дар форум масоили сармоягузориҳои сабз, рушди устувор ва табдилёбии рақамии иқтисоди Тоҷикистон баррасӣ мешавад.
Форум то 16-уми октябр идома ёфта, дар кори он намояндагони тиҷорат, созмонҳои байнулмилалӣ, ниҳодҳои молиявӣ ва мақомоти ҳокимияти давлатӣ ширкат меварзанд. Чорабиниҳои асосии форум дар маҷмааи миллии “Кохи Ваҳдат” баргузор мешаванд.
Мавзӯи асосими форум “Сармоягузориҳои сабз: имконоти имрӯз барои ояндаи устувор” сиёсати стратегии Тоҷикистонро дар самти рушди иқтисоди инноватсионӣ, аз лиҳози экологӣ масъул ва рақамӣ таҷассум месозад.
Имрӯз, инчунин, иҷлосияҳои соҳавӣ дар мавзӯҳои сармоягузории сабз ва энергетикаи тоза, маблағгузории устувор ва усулҳои ESG, инчунин технологияҳои рақамӣ, зеҳни сунъӣ ва ҳукумати электронӣ доир мегарданд.
Рӯзи 15-уми октябр баррасии масоили марбут ба технологияҳои молиявӣ, бахши кишоварзӣ ва сайёҳӣ, инчунин таҷрибаи шарикии давлату бахши хусусӣ дар Осиёи Марказӣ ба нақша гирифта шудааст.
Ғайр аз ин, дар ин рӯз барои сармоягузорон баргузории форуми таҳлилӣ, нишасти матбуотӣ оид ба наттиҷаҳои форум ва намоишгоҳи байнулмилалии "Dushanbe Invest-2025" дар назар аст, ки дар он дастовардҳои соҳаи саноат, энергетика, технологияҳои иттилоотӣ ва иртиботӣ, тиҷорат дар бахши кишоварзӣ ва сайёҳии устувор ба намоиш гузошта мешаванд.
Яке аз рӯйдодҳои марказии форум намоишгоҳи байнулмилалии "Dushanbe Invest-2025" хоҳад шуд, ки дар он имконоти Тоҷикистон дар соҳаи саноату инноватсияҳо муаррифӣ мегардад. Он самтҳоеро аз қабили саноату иншооти зерсохтор, энергетика ва технологияҳои сабз, тиҷорат дар бахши кишоварзӣ ва соҳаи кишовразӣ, сайёҳӣ ва мероси фарҳангӣ, рақамисозӣ ва технологияҳои иттилоотӣ (IT), молия ва хидматрасониҳои бонкӣ, маориф ва рушди сармояи инсониро фаро мегирад.
Ҳамзамон бо ҷаласаҳои асосӣ баргузории муколамаҳо дар мавзӯъҳои ҷудогона, дарсҳои маҳорат ва мизҳои мудаввар, ки аз ҷониби шарикони байнулмилалӣ ва миллӣ созмон дода мешаванд, пешбинӣ шудааст.
Форум аз ҷониби Кумитаи давлатии сармоягузорӣ ва идораи амволи давлатии Тоҷикистон дар ҳамдастӣ бор шаҳрдории Душанбе ва дастгирии ҳукумати кишвар созмон дода мешавад.
Ба гуфтаи созмондиҳандагон, форум ба ҷалби сармоягузорӣ ба соҳаҳои афзалиятноки иқтисод, пешбурди технологияҳои сабз ва роҳу воситаҳои ҳаллу фасли рақамӣ, табодули таҷриба оид ба ҷорисозии ESG-моделҳо ва рушди робитаҳо байни ширкатҳои ватанӣ ва хориҷӣ равона шудааст.
Аз натиҷаҳои кори форум имзои ёддошт ва созмшномаҳо дар бораи ҳамкорӣ, рӯнамоии лоиҳаҳои сармоягузорӣ ва роҳандозии робитаҳои нави байнулмилалӣ дар назар аст.
Руcский