Мақомоти Қирғизистон дар шаҳри Оши ин кишвар дар доираи қазияи ҷалби зархаридӣ барои ширкат дар ҷанги кишвари дигар як корманди “Хонаи Русия” (Русский дом)-ро боздошт кардаанд. Ӯ ва се нафаре, ки қаблан дастгир шуда буданд, ба гуфтаи вакили дифои яке аз онҳо "ба ҷалби зархаридон дар ҷанги Украина гумонбар мебошанд".

Дар ин бора хабаргузории “Интерфакс” дар такя ба додгоҳи ноҳияи Первомайски Бишкек хабар додааст. Ҳукми додгоҳ оид ба ҳабси пешакии ӯ 17-уми апрел баромадааст.

Ба иттилои манбаъ, Наталя Секерина дар “Хонаи Русия”, ки як бахши созмони русии “Россотрудничество” аст,  кор мекард.

Дар ҳамин ҳол, қаблан дар доираи ин қазия се нафари дигар, аз ҷумла Сергей Лапушкин, корманди бахши матбуоти  шаҳрдории Ош низ боздошт шуда буданд. Шахсияти ду нафари дигар то ҳол маълум нест.

Ҳар чаҳор гумонбар низ то 17-уми июни соли 2025 ба ҳабси пешакӣ гирифта шуданд.

Боздоштшудаҳо дар ҷалб, маблағгузорӣ, таъминоти моддӣ ва таълими зархаридон бо мақсади истифода аз онҳо дар даргириҳои мусаллаҳонаи давлатҳои дигар ё амалҳои зӯроварӣ, ки ба сарнагун кардани ҳокимияти давлатӣ ё поймол кардани тамомияти арзӣ, инчунин истифодаи зархаридон дар даргириҳо ва амалиёти низомӣ равона шудаанд, гумонбар дониста мешаванд.

Ба навиштаи манбаъ вакили дифои яке аз боздоштшудаҳо ба хабарнигорон гуфтааст, ки “онҳо ба ҷалби одамон барои ширкат дар амалиёти низомӣ дар Украина гумонбар мебошанд”.

"Хонаи Русия" дар Ош
Акс аз novayagazeta.ru

Гуфта мешавад, ки дар робита ба ин ҳодиса нисбати гумонбарон бар асоси моддаи “Зархаридӣ”-и (моддаи 416, қисми 1) -и Кодекси ҷиноятии Қирғизистон парвандаи ҷиноӣ боз шудааст. Тибқи ин банди қонун ба онҳо аз 7 то 15 соли маҳрумият аз озодӣ таҳдид мекунад.

Дар ҳамин ҳол, намояндагии “Россотрудничество” дар Қирғизистон аз боздошти Наталя Секерина изҳори нигаронӣ карда, гуфтаанд, ки дар бораи моҳияти иттиҳомоти мазкур маълумоти пурра надоранд.

Онҳо гуфтаанд, ки Наталя Секерина шаҳрванди Қирғизистон буд, аз моҳи июли соли гузашта ҳамчун масъули робита бо ВАО-и филиали онҳо дар Ош кор мекард.

Қаблан дар Ӯзекистон як сокини Андиҷон ҳамроҳи як нафари дигар бо гумони ҷалби шаҳрвандони ин кишвар барои ширкат дар даргириҳои мусаллаҳонаи Украина боздошт ва зиндонӣ шуда буданд. Фурқатбек Ҳасанови 39-сола, ки ронандаи таксӣ шуда кор мекардааст дар додгоҳ ба гуноҳи худ эътироф кардааст.

Чанд моҳ қабл мақомоти Озарбойҷон аз баста шудани “Хонаи Русия” дар Боку хабар доданд. Ҳукумати ин кишвар гуфтааст, ки Озарбойҷон “дигар дахолати берунаро ба корҳои дохилии худ таҳаммул кардан намехоҳанд”.

Бояд гуфт, ки “Хонаи Русия”, як бахши созмони русии “Россотрудничество”  мебошад, ки асосан дар кишварҳои собиқ Шӯравӣ, аз ҷумла Тоҷикистон озодона фаъолият дорад. Ин созмон аз моҳи июли соли 2022 дар феҳристи таҳримҳои Иттиҳодияи Аврупо қарор гирифт.

Дар Telegram, Facebook ва Instagram бо мо бимонед.