Томас Вест, намояндаи вижаи Амрико дар умури Афғонистон пас аз сафараш ба Тоҷикистон навишт, ки кишвараш дар робита ба оғози як раванди сиёсии ҳамаҷониба дар Афғонистон, бо Тоҷикистон ҳамназар аст. Дар ин бора Вэст дар саҳфаи Твиттараш хабар дод.

Ӯ рӯзи панҷшанбе, 2 июн дар Твиттери худ дар робита ба сафараш ба Тоҷикистон навиштааст, ки бо Раисҷумҳури Тоҷикистон Эмомалӣ Раҳмон, вазири хориҷа Сироҷиддин Муҳриддин, ва фармондеҳи нерӯҳои марзбонии ин кишвар дидор ва гуфтугӯ кардааст.

Томас Вест афзудааст: "Амрико ба дархости Тоҷикистон барои оғози як тарҳи сиёсии мусолиматомез, ки дар он ҳамаи тарафҳои Афғонистон иштирок дошта бошанд, шарик аст". 

Ӯ ҳамчунон ҳушдор додааст, ки дар ғайри ин сурат бояд нигарони ин буд, ки ба самти бесуботии бештаре пеш хоҳем рафт.

Намояндаи вижаи Амрико дар умури Афғонистон афзудааст, ки Иёлоти Муттаҳида ба машварат ва ҳамкории наздик бо Тоҷикистон дар бораи ояндаи Афғонистон идома медиҳад.

Ӯ навиштааст, ки "Тоҷикистон бо Афғонистон марзӣ тӯлонӣ ва кӯҳистонӣ дошта аз таҳдидҳои амниятӣ нигаронии асоснок дорад. ИМА аз назорат ва мудирияти қавӣ ва тавонмандии марзҳо ҳимоят мекунад".

Дар Telegram, Facebook, Instagram, OK ва ВК бо мо бимонед.