Дар Русия аз 1-уми декабр марҳилаи нав оид ба ҷамъоварии маълумоти биометрӣ аз шахсони хориҷии ба кишвар воридшаванда оғоз шуд. Акнун он дар ҳамаи гузаргоҳҳои давлатии сарҳадӣ амал мекунад. Хабаргузории ТАСС навишт, ки чунин супориш дар қарори марбутаи ҳукумати Русия зикр шудааст.
Пештар ин озмоиш танҳо ба хориҷиёне дахл дошт, ки ба Русия танҳо тариқи фурудгоҳҳои Маскав ва постгоҳи назоратии автомобилии “Маштаково” ворид мешуданд.
Дар санад гуфта мешавад, амали марҳилаи нави тағйирот дар озмоиш аз соати 00:00-и 1 декабри соли 2025 оғоз гардида, то 30 июни соли 2026 давом мекунад. Дар ин давра “бо мавҷуд будани имконоти техникӣ дар гузаргоҳҳо тариқи сарҳади давлатӣ” ҷамъоварии маълумоти биометрии шаҳрвандони хориҷӣ ва шахсони бешаҳрвандӣ зимни убури сарҳад аз ҷониби онҳо тариқи чунин гузаргоҳҳо таъмин карда мешавад.
Дар қарор инчнуин номгӯи категорияҳои шаҳрвандон, ки нисбати онҳо ин озмоиш амал намекунад, муайян карда шудааст. Ба ин категория шаҳрвандони зерин мансубанд:
- кормандони хадамоти алоқаи (фелдъегерӣ)-и байниҳукуматӣ;
- шаҳрвандони Беларус;
- роҳбарон ва кормандони намояндагиҳои дипломатӣ ва муассисаҳои консулгарӣ дар Русия; шахсони мансабдори созмонҳои бпйнулмилалӣ ва намояндагиҳои онҳо, моликони шиносномаҳои дипломатӣ ва хидматӣ, ки тибқи уҳдадориҳои хидматӣ ё дар ҳайатҳои расмӣ ба кишвар ворид мешаванд; шаҳрвандони хориҷӣ бо доштани раводид (виза)-и дипломатӣ ё хидматӣ;
- кӯдакони синни то 6-сола.
Дар доираи озмоиш то кунун кадом корҳо амалӣ шуданд?
Марҳилаи аввали озмоиш 1 декабри соли 2024 оғоз шуд. Аз ҳамон вақт шаҳрвандони хориҷие, ки тариқи фурудгоҳҳои байнулмилалии Маскав - Домодедово, Шереметево ва Внуково, инчунин фурудгоҳи “Жуковский” дар вилояти Маскав ва гузаргоҳи заминии автомобилии “Маштаково” дар вилояти Оренбург ба Русия ворид мешуданд, уҳдадор шуданд, ки зимни убури марз бевосита дар ҳамон ҷо маълумоти биометрӣ супоранд.
Марҳилаи дигари марбут ба тағйирот дар қоидаҳои вуруди муҳоҷирон 30 июни соли 2025 оғоз шуд. Дар он имкони пешакӣ огоҳ намудан дар бораи мақсади сафар ба Русия ва супоридани маълумоти биометрӣ то сафар пешбинӣ шуда буд.
Барои ворид шудан ба Русия тариқи бидуни раводид шаҳрвандони хориҷӣ бо шумули намояндагони шахсони корношоям ё ноболиғ, метавонанд на дертар аз 72 соат то сафари пешбинишуда аризаи махсуси электрониро пур кунанд. Онро метавон тариқи замимаи мобилии RuID пур ва пешниҳод намуд.
Тавре ки дар маркази матбуоти ВКД Русия шарҳ додаанд, чунин сабти пешакӣ дар замима, ки аз супоридани маълумоти биометрӣ ва пур кардани аризаи электронӣ иборат аст, ихтиёрӣ аст ва наметавонд барои рад кардани вуруд ба кишвар асос шавад.
Руcский