Маркази миллии тестӣ (ММТ)-и назди президенти ҶТ сабти номи довталабон ба имтиҳоноти қабул ба макотиби олии ҷумҳуриро то 30-юми апрел дароз кард.

Бино ба иттилои сомонаи расмии ММТ, тибқи розигии президент вобаста ба дархости Вазорати маорифи кишвар, инчунин хоҳиши шаҳрвандон, дар доираи  марҳалаи азнавбақайдгирӣ, то таърихи 30 апрел бақайдгирии довталабони азқайднагузашта низ идома хоҳад ёфт.

Қобили зикр аст, ки айни замон теъдоди онҳое, ки номнавис шудаанд, 49 ҳазору 958 нафарро ташкил мекунад. Инчунин тибқи маълумоти оморӣ шумораи довталабон дар кластерҳои 4 (ҷомеашиносӣ ва ҳуқуқ) ва 5  (тиббӣ, биологӣ ва варзиш) нисбат ба нақшаи қабул ба маротиб зиёд мебошад. Шумораи ками довталабон ба кластери 1 (табиӣ ва техникӣ) рост меояд.

ММТ қаблан иттилоъ дода буд, ки санаи 15-уми апрел сабти номи довталабон аз рӯи низоми нави дохилшавӣ ба мактабҳои олӣ ба итмом расид . Имтиҳонҳои қабул  рӯзҳои 1-12-уми июл баргузор мешаванд.