Маркази санитариву эпидемилогии вилояти Хатлон фаъолияти 4 ошхонаҳои мактаби таҳсилоти миёнаи умумӣ ва кӯдакистонҳо дар минтақаро муваққатан боздошт.

Сардухтури санитарии вилояти Хатлон Нурулло Бояков ба «Азия-Плюс» дар ин робита иттилоъ дод, ки сабаби аз фаъолият бозмондани ошхонаҳо риоя нашудани меъёрҳои санитарӣ аст. «Ин ошхонаҳо то бартараф кардани камбудиҳояшон баста шуданд», - гуфт Бояков.

Ба гуфтаи ӯ, аз оғози сол дар вилояти Хатлон вазъи санитарии 4 ҳазору 72 иншоот санҷида шуда, аз рӯйи натиҷаҳои ин санҷишҳо 850 нафар ба ҷазои маъмурӣ кашида шуданд. «Онҳо ба маблағи умумии 70 ҳазору 310 сомонӣ ҷаримабандӣ шуданд», - иброз дошт сардухтури вилоят.

Номбурда ҳамчунин зикр кард, ки фаъолияти 143 иншооти дигар то бартараф намудани камбудиҳо боздошта шудааст.