Бахши Ҳизби наҳзати исломии Тоҷикистон дар минтақаи Қурғонтеппаи вилояти Хатлон чанде қабл ба аҳолии аз офати табиӣ осебдидаи ноҳияи Қумсангир кумак кард.

Бино ба иттилои сомонаи расмии ҲНИТ, Қамариддин Афзалӣ, раиси шӯъбаи мазкур гуфтааст, рӯзи 26 май ҳайатеро барои расонидани як миқдор сарулибос, асбоби рӯзгор ва каме маблағе, ки аз сӯи аъзо ва ҳаводрони ҳизб ҷамъ оварда будем, барои мардуми селзадаи ноҳияи Қумсангир равона сохтаанд.

«Агарчи кӯмаки навбатии мо ночиз ҳам бошад, вале шодиву хурсанди мардуми зарардидаро ҳадду канор набуд. Онҳо миннатдорӣ карданду ба мубтакирин ин амри хайр дуъои нек намуданд», - иброз доштааст ӯ.

Ёдрас мекунем, ки бар асари боришоти шадиди рӯзи 13-уми май дар кӯчаи Шамсиддини Шоҳини маркази ноҳияи Қумсангир 8 манзили зист пурра ва 13 хона қисман хароб гардида, боришот ба 3,5 гектар заминҳои наздиҳавлигии сокинони ноҳия низ осеб расонид.