Аз  16 то 23 майи соли 2014 дар шаҳри Сеули Ҷумҳурии Корея ҳафтумин ҳамоиши байналмилалии «Занҳои ихтироъкор» баргузор гардид, ки  дар он аз 26 давлат 800 ихтироъ пешниҳод карда шуд.

Тавре аз Муассисаи давлатии Маркази миллии патенту иттилооти Вазорати рушди иқтисод ва савдои ҶТ хабар доданд, аз Тоҷикистон 3 ихтироъ, ки муаллифонашон занҳои ихтироъкор аз Ҷумҳурии Тоҷикистон буданд, пешниҳод карда шуд.

Ба иттилои манбаъ, муаллиф ва ҳаммуаллифи ду ихтироъ дар соҳаи кимиё ва як ихтироъ дар соҳаи тиб, ки устоди Донишгоҳи миллии Тоҷикистон, доктори фанҳои кимиё, дотсент Раҳимова Мубошира мебошад, бо 1 медали тилло, 2 нуқра ва 1 биринҷӣ қадрдонӣ карда шуд.

Инчунин, дар чорабинӣ аввалин маротиба дар ҷаҳон ба  Раҳимова Мубошира Ҷоизаи Ҷумҳурии Исломии Эрон зери унвони «Беҳтарин зани ихтироъкор» (Диплом) ва Ҷоизаи Ҷумҳурии Индонезия (Сертификат) супорида шуд.

Ин бори сеюм аст, ки бонувон-ихтироъкорони тоҷик дар чунин ҳамоишҳои байналмилалӣ иштирок намуда, соҳиби медалҳо ва ҷоизаҳои махсус мегарданд.

Дастовардҳои мазкур шаҳодат аз ғамхорӣ ва дастгирии Ҳукумати Ҷумҳурии Тоҷикистон дар соҳаи ихтироъкорӣ дар ҷумҳурӣ мебошад.

Ҳамоиши байналмилалӣ бо дастгирии Идораи патентии Кореяи Ҷанубӣ, Ассотсиатсияи занҳои ихтироъкори Кореяи Ҷанубӣ ва Созмони умумиҷаҳонии моликияти зеҳнӣ баргузор карда шуд.