Ҷамъияти Ҳилоли Аҳмари Тоҷикистон (ҶҲАТ) ба аҳолии аз обхезии нимаи моҳи май осебдидаи ноҳияи Рӯдакӣ кумаки таъҷилӣ расонид.

Котиби иҷроияи филиали ноҳиявии ҶҳАТ Ризқинисо Худойбердиева ба «Азия-Плюс» дар ин робита итттилоъ дод, ки намояндагони ҷамъият ҳамроҳ бо мақомоти маҳаллии ҳокимияти давлатӣ пас аз 30 дақиқаи обхезӣ ба ҷойи ҳодиса ҳозир шудаанд.

«Дар макони офати табиӣ вазъ ва зиёни расида бар асари обхезӣ пешакӣ арзёбӣ шуда, дархостҳои аввалини аҳолии беманзилмонда ба иҷро расиданд», - гуфт Худойбердиева.

Ба қавли ӯ, ба аҳолии осебдидаи ноҳия кумаки ғайриғизоӣ – кӯрпаву болишт, кммпалҳои пахтагин, маҷмӯи рӯйпӯш барои ҷогаҳ (50 дона), маҷмӯи масолеҳи сохтмон (59 адад), хаймаҳои оилавӣ (2 дона) ва рӯйпӯшҳои пластикӣ (10 дона) дода шуданд. «Баъдтар рӯзи 23-юми май бар асоси номаи ҳукумати ноҳияи Рӯдакӣ ба аҳолии ҷамоати Зайнабобод деҳаҳои Комосомол, Адолат ва Файзоб низ барои 200 оила кумаки ғайриғизоӣ расонида шуд», - иброз дошт ӯ.

Ёдрас мекунем, ки рӯзи 10-уми май бар асари обхезӣ дар ноҳияи Рӯдакӣ беш аз 400 манзили зист осеб дида, дар натиҷаи болоравии беҳад зиёди сатҳи об дар дарёи Элок ба аҳолӣ ва зербинои деҳаҳои Комосомол 1,2, Тоҷикобод, Адолат ва Шафақ зарари зиёд  расонида шуд.