Дар чорчӯбаи лоиҳаи "Таъминот барои дастгирии ислоҳоти низоми нафақа", Иттиҳоди Аврупо (ИА) имрӯз ба Агентии суғуртаи иҷтимоӣ ва нафақа назди Ҳукумати Ҷумҳурии Тоҷикистон таҷҳизоти компютериро тӯҳфа кардааст.

Бино ба маълумоти намояндагии ИА дар ҶТ, маҷмӯаи таҷҳизот иборат аз чизҳои зерин аст: 3-то сервер, 2-то манбаъи таъмини доимии барқ (УПС) барои маркази ҷамъоварии маълумот, 108-то УПС барои таҷҳизоти шабакавӣ, 4-то кондитсионер, 78-то таҷҳизоти ВПН (VPN), 850-то компютери сабук (ноутбук), 115-то чопкунаки (принтери) лазерӣ бо симу ноқилҳо, васлакҳои шабака ва пайвандкунакҳо. Маблағи умумии таҷҳизоти мазкур, ки аз тарафи ширкати "КАНКОМ он лайн ГмбХ" дастрас мегардад, ба 894 000 евро (тақрибан 6 250 000 сомонӣ) баробар аст.

Таҷҳизоти компютерии зикршуда бояд ба таҷдиди идоракунии низоми нафақа дар Тоҷикистон мусоидат намояд. Акнун ҷиҳати ҳисоб кардани ҳаҷми нафақаи ҳар як нафар аз рўи пардохти маблағҳои суғуртавияш, мудирияти низоми нафақа системаи нави иттилоотиро дар даст дошта метавонад маълумотҳои заруриро ҷамъ, ҳифз ва коркард бикунад.

Лоиҳаи марбут "Кӯмаки техникӣ барои ислоҳоти низоми нафақа дар Тоҷикистон" бо маблағи умумияш 1,5 миллион евро ба ислоҳоти асоси меъёрӣ ва механизми идоракунии низоми нафақа равона карда шуда, то охири соли 2014 давом хоҳад дошт. Дар оянда ингуна кӯмакҳо дар чорчӯбаи барномаи дуюми серсоҳаи Иттиҳоди Аврупо "Дастгирии рушди инсонӣ" (ба маблағи 30,5 миллион евро барои солҳои 2014-2017) идома дода мешаванд.