Таҷлили ҷашни Рӯзи ваҳдати миллӣ дар пойтахт бо мушакпарронӣ (фейервек)-и 7-дақиқаина ба хотима мерасад.

Бо қарори мақомоти шаҳрдории Душанбе, ба ифтихори таҷлили ҷашни Ваҳдати миллӣ рӯзи 27-уми июн дар Боғи Наврӯзгоҳи пойтахт бо иштироки ҳунармандони театр, устодони санъат ва ситораҳои эстрадаи тоҷик консерти идона баргузор мешавад.

Ҳамчунин дар Муассисаи давлатии «Душанбе-плаза» тӯйи арӯсиву домодии 90 ҷуфт ҷавонон ва дар Боғи пойтахт хатнасури 360 нафар кӯдакон аз оилаҳои ниёзманди ноҳияҳои шаҳри Душанбе доир мегардад. Тамоми хароҷоти ин маъракаҳоро мақомоти шаҳрдории пойтахт ба зиммаи худ мегирад.

Раёсати ВКД Тоҷикистон дар шаҳри Душанбе ва Раёсати КДАМ дар пойтахт вазифадор карда шудаанд, ки рӯзҳои ташкил ва баргузории чорабиниҳо ҷиҳати ҳифзи тартиботи ҷамъиятӣ, таъмини амнияти шаҳрвандон, нигаҳдошти реквизиту лавозимот ва экспозитсияву воситаҳои ороишӣ тадбирҳои иловагӣ андешанд.