Мусоидат ба пардохти музди меҳнати муҳоҷирони кории тоҷик яке аз самтҳои муҳими фаъолияти намояндагии Хадамоти муҳоҷирати Вазорати меҳнат, муҳоҷират ва шуғли аҳолии Тоҷикистон дар Русия маҳсуб меёбад.

Котиби матбуотии намояндагии мазкур Иброҳим Аҳмадов ба «Азия-Плюс» дар ин робита иттилоъ дод, ки ҳамин ҳафта бо мусоидати намояндагӣ ба ду нафар муҳоҷирони тоҷик – зодаи ноҳияи Рашт Шуҳрат Қулов ва сокини ноҳияи Шаҳритӯс Кароматулло Мӯминов мутаносибан дар ҳаҷми 50 ҳазор ва 105 ҳазор рубл музди меҳнаташон пардохта шуд.

Ба гуфтаи манбаъ, дар муроҷиати худ ба намояндагӣ муҳоҷирон шикоят кардаанд, ки моҳҳои ахир раҳбарияти корхонаҳои сохтмонӣ бо сабабҳои номаълум пардохти музди меҳнатро ба дарозо мекашанд. «Пас аз суҳбати корманди намояндагӣ бо роҳбарони корхонаҳо ин масъала ба нафъи бинокорони тоҷик ҳал шуд», - иброз дошт ӯ.

Зимнан зикр гардид, ки муроҷиати муҳоҷирони кории тоҷик ба намояндагӣ доир ба ин масъала хеле зиёд ба мушоҳида мерасад. «Мутаассифона, қариб дар ҳама ҳолатҳо миёни корфармо ва коргар шартномаи меҳнатӣ ба имзо нарасидааст, ки ба рӯи кор омадани мушкилот зимни пардохти музди меҳнат боис мегардад», - афзуд номбурда.