Раиси Шӯрои миллӣ (парлумон)-и Ҷумҳурии Исломии Афғонистон Абдул Рауф Иброҳимӣ шоми рӯзи чоршанбе бо сафари расмии серӯза ба Тоҷикистон ташриф овард.

Тавре ба «Азия-Плюс» котиби матбуотии Маҷлиси намояндагони Маҷлиси Олии ҶТ Муҳаммадато Султонов хабар дод, дар Фурудгоҳи байнулмилалии Душанбе меҳмони олимақомро муовини аввали раиси палатаи поёнии парлумони ҷумҳурӣ Амиршо Миралиев пешвоз гирифт.

Нимаи аввали имрӯз дидору гуфтушуниди раиси парлумони Афғонистон бо президенти Тоҷикистон Эмомалӣ Раҳмон ва раиси палатаи поёнии парлумон Шукурҷон Зуҳуров дар назар аст. Абдул Рауф Иброҳимӣ ба ВКД ва Вазораи адлияи ҶТ низ ташриф меорад.

«Дар ҷараёни дидор ва гуфтушунидҳои раиси парлумони Афғонистон ба масъалаҳои рушди ҳамкориҳо миёни парлумонҳои ҳарду кишвар таваҷҷуҳи хосса зоҳир хоҳад шуд», - гуфт Султонов.

Зикр гардид, ки раиси парлумони кишвари ҳасоя ҳамчунин аз Китобхонаи миллии ҷумҳурӣ, маҷмааи фарҳангиву фароғатии «Кохи Наврӯз» ва нерӯгоҳи барқи обии Норак низ боздид хоҳад кард.

Қобили зикр аст, ки намояндаи аққалияти миллии ӯзбекҳои Афғонистон Абдул Рауф Иброҳимӣ моҳи феврали соли 2011 раиси парлумони ин кишвар интихоб шуда буд.