Анҷумани пешазинтихоботии Ҳизби халқии демократии Тоҷикистон, ки имрӯз дар маҷмаии «Кохи Ваҳдат» ба кор оғоз намуд, пушти дарҳои пӯшида ҷараён дорад. Ба намояндагони расонаҳои мустақил барои иштирок дар анҷман иҷозат дода нашуда, ҳамаи онҳо интизори ба охир расидани анҷуман ва гуфтугӯ бо иштирокчиёни он мебошанд.

Қобили зикр аст, ки анҷумани пешазинтихоботии ҲХДТ бо иштироки пешвои ҳизб, президенти Тоҷикистон Эмомалӣ Раҳмон баргузор шуда истодааст. Маъракаи интихоботи вакилон ба Маҷлиси намояндагон ва маҷлисҳои маҳаллии ҷумҳурӣ ба санаи 1-уми марти соли 2015 таъин карда шудаанд.

Ҳизби халқии демократии Тоҷикистон 10-уми декабри соли 1994 таъсис ёфта, айни замон шумори аъзои он ҳудуди 250 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.