Собиқ вакили палатаи поёнии парлумон ва собиқ раиси ноҳияи Восеъ Рустам Латифзода, ки қаблан ба ҳайси муовини аввали раиси Ҳизби аграрии Тоҷикистон (ҲАТ) фаъолият дошт, имрӯз дар анҷумани пешазинтихоботӣ раиси ҳизб интихоб шуд.

Тавре ба «Азия-Плюс» як манбаъ аз ҲАТ хабар дод, дар анҷуман рӯйхати ҳизбии номзадҳо ба вакилӣ дар парлумон аз ҳавзаи ягонаи умумиҷумҳуриявӣ тасдиқ гардид, ки дар садри ин рӯйхати иборат аз 14 нафар пешвои нави ҳизб Р.Латифзода қарор дорад. «Ояндаи наздик рӯйхати пурраи номзадҳои ҲАТ ба ҳамагон пешниҳод мешавад», - гуфт сарчашмаи хабар.

Қобили зикр аст, ки пас аз даргузашти раиси пешинаи ҳизб, вакили палатаи поёнии парлумон, академик Амир Қаракулов рӯзи 10-уми марти соли 2014, ҳизбро се муовини ӯ ва аслан муовини аввал, собиқ раиси ноҳияи Восеъ Рустам Латифзода роҳбарӣ мекарданд.

Ҳизби аграрии Тоҷикистон соли 2005 таъсис дода шуда, айни замон дар сафҳояш ҳудуди 50 ҳазор нафарро муттаҳид мекунад ва дар палатаи поёнии парлумони даъвати кунунӣ соҳиби ду курсии вакилӣ аст.