Ҳукумати Тоҷикистон дар назди Вазорати рушди иқтисод ва савдо гурӯҳи кориеро таъсис додааст, ки масъалаҳои марбут ба эҳтимоли узвияти Тоҷикистон ба Иттиҳоди иқтисодии Авруосиё (ИИАО)-ро меомӯзад.

Муовини аввали сардори Хадамоти гумруки назди ҳукумати ҶТ Неъмат Раҳматов зимни нишасти хабарӣ дар ин робита изҳор намуд, ки «ин масъалаест, ки таҳлили ҳамаҷонибаро тақозо мекунад».

Ба гуфтаи Раҳматов, танҳо баъди омӯзиши дақиқу муфассали ин масъала аз ҷониби аъзои гурӯҳи корӣ, метавон дар бораи кадом як қарори мушаххасе ҳарф зад.

Ӯ бар ин назар аст, ки қабл аз шомил гардидан ба иттиҳоде, Тоҷикистон бояд ҳамаи натиҷаҳои имконпазири мусбат ва манфӣ аз ин ҳамроҳшавиро ба инобат бигирад.

Ёдрас мекунем, ки Иттиҳоди иқтисодии Авруосиё аз 1-уми январи соли равон дар заминаи Иттиҳоди гумрукии Русияву Қазоқистон ва Белорус ба фаъолият шурӯъ кард. Айни замон Русия, Белорус, Қазоқистон ва Арманистон аъзои Иттиҳод мебошанд. Ҳамчунин созишномаи узвияти Қирғизистон ба ин Иттиҳод низ ба имзо расид, ки аз моҳи майи соли ҷорӣ мавриди амал қарор мегирад.