Соли гузашта ба Тоҷикистон ба маблағи умумии 180 млн. доллари ИМА қариб 295 ҳазор тонна гази моеъ ворид карда шуд.

Бино ба маълумоти Агентии омори назди президенти ҶТ, ҳаҷми воридоти ин навъи сӯзишворӣ соли гузашта аз рӯйи ҳаҷм тақрибан 13% ва аз рӯи арзиш – 10,5% афзудаааст. Соли 2013 ба ҷумҳурӣ ба маблағи 162 млн. доллари ИМА дар маҷмӯъ 261 ҳазор тонна гази моеъ ворид гардида буд.

Қобили зикр аст, ки ин навъи сӯзишвориро Тоҷикистон асосан аз Қазоқистон (78% аз ҳаҷми умумӣ) ва ҳамчунин аз Русияву Туркманистон, Қирғизистон ва Латвия низ ворид мекунад.

Тибқи маълумоти Вазорати рушди иқтисод ва савдо, айни замон тақрибан 45%-и нақлиёти автомобилии кишвар бинобар сабаби гаронии бензин, ба сифати сӯзишворӣ аз гази моеъ истифода мекунанд.

Дар нуқтаҳои фурӯши маводи сӯзишвории Тоҷикистон айни замон гази моеъ беш аз ду маротиба арзонтар нисбат ба бензин ва сӯзишвории дизелӣ (солярка) фурӯхта мешавад.