Тамоили коҳиши содироти нахи пахта, ки яке аз маҳсулоти асосии содиротии Тоҷикистон маҳсуб меёбад, дар соли 2014 идома ёфт.

Сардори Раёсати омори савдо ва хизматгузории Агентии омори назди президенти ҶТ Фирдавс Асматбеков ба «Азия-Плюс» дар ин робита иттилоъ дод, ки соли 2014 аз Тоҷикистон ба хориҷи кишвар ба маблағи умумии 132,1 млн. доллари ИМА 86,4  ҳазор тонна нахи пахта содирот шудааст, ки нисбат ба соли 2013 аз рӯи арзиш 30,2% ва аз рӯи ҳаҷм 24,5% камтар аст.

«Соли 2013 Тоҷикистон дар маҷмӯъ 115 ҳазор тонна нахи пахтаро ба хориҷи кишвар содирот карда буд, ки маблағи умумиаш 190 млн. доллари ИМА-ро ташкил дод. Соли 2012 ин нишондиҳандаҳо мутаносибан ба 144 ҳазор тонна ва маблағи умумиаш ба 224 млн. доллари ИМА баробар буданд», - хотиррасон намуд Асматбеков.

Ба гуфтаи ӯ, соли гузашта нахи пахта аз Тоҷикистон асосан ба Туркия (40,7% аз ҳаҷми умумӣ), Эрон (21,4%), Русия (15,7%), Покистон (13,4%) ва дар ҳаҷми начандон зиёд ба Латвия, Чин, Аморати Муттаҳидаи Араб, Молдова, Белорус, Қазоқистон, Литва ва Арманистон интиқол дода шудааст.

Бино ба маълумоти Вазорати кишоварзии ҶТ, соли 2014 дар Тоҷикистон пунбадона дар майдони умумии ҳудуди 178 ҳазор гектар кишт шуда, дар маҷмӯъ наздики 373 ҳазор тонна ҳосили пахта ҷамъоварӣ шуд, ки аз нақшаи пешбинишуда 5,1% камтар аст.