- Иҷрои дархости ҷамъияти нобиноёни Тоҷикистон оид ба нашри варақаҳои овоздиҳии махсус барои нобиноён бо шрифти Брайл ҷиҳати овоздиҳӣ дар интихоботи парлумонӣ айни замон ғайриимкон аст, - иттилоъ дод роҳбари дастгоҳи КМИР Тоҷикистон Абдуманнон Додозода.

Ба гуфтаи ӯ, шумори интихобкунандагони нобино дар кишвар хеле камшумор буда, онҳо дар минтақаҳои гуногун зиндагӣ мекунанд ва нашри 10-12 нусха чунин варақаҳои овозодиҳӣ барои чанде аз ҳавзахои овоздиҳӣ имконнопазир аст.

«КМИР ба ҳавзахои интихоботӣ тавсия дод, ки умуман ба маъюбон, аз ҷумла нобиноён зимни овоздиҳӣ ҳамаҷониба кумак расонида шавад ва ғайр аз ин, дар қонунгузории кишвар пешбинӣ шудааст, ки шахсони имконияташон маҳдуд зимни раъйдиҳӣ метавонанд аз хизмати афроди бидуни манфиат, ба ҷуз аъзои комиссияҳои интихоботӣ истифода кунанд», - иброз дошт номбурда.

Зимнан зикр гардид, ки ҳамчунин дар маҳалҳо маъюбон бо ҳуқуқи раъйдиҳӣ дар қуттиҳои сайёри овоздиҳӣ таъмин карда мешаванд.

Дар ҳамин ҳол, тибқи маълумоти ҷамъияти нобиноёни Тоҷикистон, айни замон шумори аъзои ин ҷамъият беш аз 9 ҳазор нафарро ташкил медиҳад. Тибқи маълумоти ғайрирасмӣ бошад, шумори нобиноён дар Тоҷикисон қариб ба 15 ҳазор нафар мерасад, зеро аксари онҳо расман ба қайд гирифта нашудаанд.