Таҳияи созишномаҳои молӣ ва сермиллии лоиҳаи CASA-1000 барои давраи аввал, ки ба амалиёт бо барқ ва интиқоли он марбут аст, ба итмом мерасад.

Дар сомонаи расмии лоиҳа дар ин робита зикр мегардад, ки аз ин ба баъд марҳилаи сохтмон оғоз мегардад. «Ба ширкати ECODIT LLC. – паймонкори асосии Лоиҳаи USAID Energy Links, ки Котиботи CASA-1000-ро аз лиҳози техникӣ ва молӣ дастгирӣ мекунад, барои ивази Директори амалкунандаи иҷроияи Котибот дар марҳилаи сохтмон мутахассиси соҳибтаҷриба талаб карда мешавад», -гқайд мегардад дар иттилои сомона.

Шарҳ дода мешавад, ки ин вазифаи зинаи болоӣ дар бахши электроэнергетика аст, ки тамоми лоиҳаи сермиллӣ оид ба интиқоли нерӯи барқро роҳбарӣ мекунад ва баъди шурӯъи сохтмон вазифаи асосии Директори иҷроияи Котибот аз идоракунии ҷараёни сохтмони хат ва иншооти интиқоли барқ иборат хоҳад буд. «Аз ин рӯ, номзад ба ин вазифа аз таҷрибаи ғанӣ дар соҳаи сохтмони хатти интиқоли барқ бояд бархӯрдор бошад», - омадааст дар хабари сомонаи лоиҳа.

Даҳаи сеюми моҳи январи соли ҷорӣ иттилоъ дода будем, ки барои маблағгузорӣ ба амалисозии қисмати Лоиҳаи интиқол ва савдои нерӯи барқ дар Осиёи Марказӣ ва Ҷанубӣ (CASA-100) дар қаламрави кишвар, мақомоти Тоҷикистон сармоягузоронро дарёфт намуданд.

Ёдрас мекунем, ки тибқи лоиҳаи CASA-1000  сохтмони хатти интиқоли барқи минтақавӣ аз Тоҷикистону Қирғизистон ба Афғонистону Покистон пешбинӣ мешавад. Бевосита оғоз гардидани корҳои амалисозии лоиҳа моҳи июни соли равон дар назар аст.