Рӯзи 22 апрели соли 2015 Вазири корҳои хориҷӣ Сироҷидин Аслов Сафири Фавқулода ва Мухтори Шоҳигарии Британияи Кабир ва Ирландияи Шимолӣ дар Ҷумҳурии Тоҷикистон Ҳю Стенли Филпоттро ба ҳузур пазируфт.

Бино ба иттилои Вазорати корҳои хориҷии ҶТ, дар рафти вохӯрӣ Сафири Британияи Кабир ба Вазири корҳои хориҷӣ оид ба қарори Ҳукумати Британияи Кабир дар масъалаи дастгирии молиявии лоиҳаи минтақавии CASA-1000 маълумот пешниҳод намуд. Инчунин ҷонибҳо масъалаҳои ҳамкории дуҷонибаи Тоҷикистону Британияи Кабир ва ҳамкории минтақавиро муҳокима намуданд.

Вазири корҳои хориҷӣ ҷониби Британияи Кабирро ҷиҳати иштироки фаъолона дар Конфронси байналмилалии сатҳи баланд роҷеъ ба натиҷаи татбиқи Даҳсолаи байналмилалии амал «Об барои ҳаёт 2005-2015», ки 9-11 июни соли ҷорӣ дар шаҳри Душанбе дар назар аст, даъват намуд.