Тоҷикистону Қирғизистон оид ба масъалаи муайян кардани арзиши содироти нерӯи барқи Тоҷикистон ба кишвари ҳамсоя дар мавсими тобистони соли равон ба мувофиқа нарасиданд.

Роҳбари хадамоти матбуоти ширкати «Барқи тоҷик» Нозир Ёдгорӣ ба «Азия-Плюс» дар ин робита иттилоъ дод, ки зимни гуфтушунидҳо миёни ширкатҳои энергетикии ҳарду кишвар, ки ҳамин моҳ дар Душанбе баргузор шудааст, Тоҷикистон ба кишвари ҳамсоя нерӯи барқи зиёдатии худро дар мавсими тобистон бо нархи 3,5 сент барои 1 кВт/соат пешниҳод намудааст.

Аммо намояндагони Қирғизистон ин нархро хеле баланд шуморида, изҳор доштаанд, ки дар ин давра барқро аз Тоҷикистон бо нархи ҳамагӣ 2 сент (1 кВт/соат) хариданианд.

Чунин пешниҳоди Қирғизистнро дар ширкати «Барқи тоҷик» қобили қабул намедонанд, зеро ин арзиш ҳатто хароҷоти худи ширкатро пӯшонида наметавонад.

Ҳамин тариқ, айни замон Қирғизистон бо назардошти имконоти худ пешниҳоди Тоҷикистонро мавриди омӯзиш қарор дода, сипас миёни ҷонибҳо давраи минбаъдаи гуфтушунидҳо дар ин хусус дар назар аст.

Тибқи маълумоти ширкати «Барқи тоҷик», дар мавсими тобистони соли гузашта аз Тоҷикистон ба Қирғизистон бо нархи 2 сент барои 1 кВт/соат 226,7 млн. кВт/соат нерӯи барқ интиқол гардида буд.

Дар ҳамин ҳол, аз моҳи июни соли гузашта арзиши 1 кВт/соат нерӯи барқ барои аҳолии Тоҷикистон 12,6 дирам (бо қурби ҳозира беш аз 2 сент) муқаррар шудааст.