Рӯзҳои 18-21 май дар маҷмааи давлатии «Кохи Борбад»-и шаҳри Душанбе нахустин намоишгоҳ-ярмаракаи музофоти Нинсяи ноҳияи мухтори Хуэйи Ҷумҳурии Мардумии Чин доир мегардад.

Дафтари матбуоти Палатаи савдо ва саноати Тоҷикистон дар шарҳи ин хабар мегӯяд, дар намоишгоҳ-ярмарка молу колои истеҳсолкунандагон ва корхонаҳои тиҷоратии беш аз 55 ширкатҳои маъруфи чинии музофоти Нинся ба маърази тамошо гузошта мешавад.

Ба иттилои манбаъ, дар ин намоишгоҳ маҳсулот барои рӯзгору хона ва сарулибос, маводи ғизойии «Ҳалол», маҳсулоти кишоварзӣ, сарулибоси миллӣ, масолеҳи сохтмон, асбобу лавозимоти маишӣ, маснӯот аз пӯсту мӯина ва таҷҳизоту технологияҳои нави энергетикаи алтернативӣ пешниҳод мегардад.

Гуфта мешавад, чорабинии мазкур аз ҷониби депатраменти тиҷорати ҳукумати мардумии музофоти Нинсяи ноҳияи мухтори Хуэйи Ҷумҳурии Мардумии Чин ва Палатаи савдо ва саноати ҶТ бо дастгирии ҳукумати Тоҷикистон созмон дода мешавад.