Дар толори конфронси Иттиҳоди журналистони Тоҷикистон рӯзи 19 июн оид ба масоили вазъи ҳамкориҳои Тоҷикистону Лаҳистон (Полша) нишасти хабарӣ доир гардид.

Ятсек Михалски, мушовири сафорати Лаҳистон дар Тоҷикистон (бо қароргоҳ дар ш.Тошканд) дар ин робита изҳор намуд, ки соли 2014 ҳаҷми муомилоти молӣ миёни кишварҳо қариб 20 млн. доллари ИМА-ро ташкил дод, ки нисбат ба сатҳи соли 2013 25% зиёдтар аст.

«Дар ҳамин ҳол, агар ҳаҷми афзоиши содироти мол аз Лаҳистон ба Тоҷикистон дар ин давра беш аз 20%-ро ташкил дода бошад, пас ҳаҷми содироти мол аз Тоҷикистон ба Лаҳистон 2,8 баробар афзуд», - таъкид дошт дипломат.

Ба гуфтаи ӯ, аз Лаҳистон ба Тоҷикистон асосан мошину таҷҳизот (ҳудуди 23% аз ҳаҷми умумӣ), маснӯот аз металлҳои ранга (20%), маҳсулоти ғизойии тайёр (беш аз 13%), маводи кимиёвӣ (беш аз 10%) ворид карда шуда, аз Тоҷикистон ба Лаҳистон нахи пахта ва маҳсулоти коркарди он (86% аз ҳаҷми умумӣ), маҳсулот аз металлҳои ранга (9%) ва дигар молу коло содирот шудааст.

«Маҳсулоти содиротии Тоҷикистон ба Лаҳистон дар маҷмӯъ аз 11 номгӯи молҳо иборат аст, ки нисбат ба соли 2013 сеяк миқдор зиёдтар мебошад. Аз нигоҳи мо ин ҳам аз афзоиши иқтидори содиротии Тоҷикистон ва ҳам аз тамоили мусбати огаҳии тоҷирони Лаҳистон аз имконоти Тоҷикистон гувоҳӣ медиҳад», - гуфт ӯ.