Тоҷикистон ба Ӯзбекистон номгӯи маҳсулоти содиротии худро пешниҳод намуд, ки асосан аз ашёи хом иборат аст.

«Айни замон гурӯҳи кории ду кишвар дар самти роҳандозии ҳамкориҳо дар бахши саноат амал карда, дар доираи он мо ба шариконамон номгӯи маҳсулоти саноатии содиротии Тоҷикистонро пешниҳод намудем» - хабар дод зимни нишасти хабарӣ вазири саноат ва технологияҳои нави Тоҷикистон Шавкат Бобозода.

Ба гуфтаи ӯ, ба ин номгӯй аз ҷумла алюминии аввалия, маъдан, нахи пахта, нерӯи барқ, семент, чарми хом, пилла, нахи абрешим, матоъҳои гуногун, мева ва хушкмева, машрубот, қолинҳо ва ғайра дохил аст.

Вазири саноат қайд кард, ки соли гузашта ҳаҷми содироти молу маҳсулоти Тоҷикистон ба Ӯзбекистон қариб ба ҳаҷми воридот аз Ӯзбекистон баробар шудааст.

Тибқи маълумоти расмии оморӣ, соли 2017 ҳаҷми муомилоти мол миёни Тоҷикистону Ӯзбекистон 82 фоиз афзуда, 126 млн. долларро ташкил дод.

Дар сохтори ҳаҷми муомилоти мол миёни кишварҳо 69 млн. доллар ба воридоти маҳсулот аз Ӯзбекистон ва 57 млн. доллар ба содироти маҳсулоти Тоҷикистон ба Ӯзбекистон рост меояд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.