Душанбе. 11-уми апрел. ОИ «Азия-Плюс» - Имрӯз дар дафтари кории Мактаби мустақили рӯзноманигории «Тоҷикистон – асри XXI » Маҷлиси умумии аъзои ташкилоти ҷамъиятии мазкур баргузор шуд.

Чӣ тавре ки сарвари иҷроияи Мактаби рӯзноманигорӣ Сафо Сафаров ба ОИ «Азия-Плюс» хабар дод, дар маҷлис ҳисоботи Раёсат оид ба фаъолияти ТҶ ММР «Тоҷикистон – асри XXI » дар соли 2008 баррасӣ ва пазируфта шуд.

Дар ҷараёни маҷлис ҳайати нави Раёсати Ташкилоти ҷамъиятии «Мактаби мустақили рӯзноманигории «Тоҷикистон -   асри XXI » барои се соли оянда интихоб карда шуд. Аз рӯи натиҷаи овоздиҳӣ Марат Мамадшоев, Искандари Фирӯз, Олга Тутубалина, Аваз Юлдошев ва Парвона Аҳрорӣ ба ҳайати Раёсат шомил гардиданд.

Рӯзноманигори шинохта ва тренери соҳибтаҷриба Искандар Фирӯз якдилона раиси нави Раёсати Мактаби мустақили рӯзноманигории «Тоҷикистон -   асри XXI » интихоб карда шуд.