Душанбе. 7-уми апрел. ОИ «Азия-Плюс» - Чанде қабл дар дафтари кории Комиссияи Аврупо дар шаҳри Душанбе вохӯрии ҳайати парлумони Аврупо бо раиси Ҳизби наҳзати исломии Тоҷикистон, намояндаи палатаи поёнии парлумон Муҳиддин Кабирӣ ва аъзои палатаи болоии парлумони кишвар Ҳоҷӣ Акбар Тӯраҷонзода баргузор шуд.

Тавре сухангӯи раиси ҲНИТ Ҳикматулло Сайфуллозода ба ОИ «Азия-Плюс» хабар дод, дар вохӯрӣ ба Қонуни нави ҶТ «Дар бораи озодии виҷдон ва иттиҳодияҳои динӣ», ки дар ҷомеаи Тоҷикистон ва хориҷи кишвар вокуниши мухталиф ба амал овард, таваҷҷӯҳи хос зоҳир карда шуд.

Ба гуфтаи Ҳ.Сайфуллозода, намояндагони ҳарду палатаи парлумони ҷумҳурӣ нисбати чанде аз бандҳои қонун изҳори ташвиш карданд. «Ҳайати парлумони Аврупо ҳамчунин ба қонунгузории мавҷудаи кишвар оид ба интихобот ба парлумон мароқ зоҳир сохта, раиси ҲНИТ М.Кабирӣ изҳор дошт, қонуни мавҷуда дар бораи интихобот ба МН МО ҶТ ба талаботи меъёрҳои баргузории интихоботи демократӣ ҷавобгӯ нест», - гуфт ӯ.

Ҳ.Сайфуллозода афзуд, дар вохӯри ҷонибҳо ҳамчуин атрофи сафари қарибулвуқӯъи М.Кабирӣ ба парлумони Аврупо ахири моҳи май табодули афкор намуданд.