Раиси Комиссияи марказии интихобот ва раъйпурсӣ (КМИР)-и Тоҷикистон Бахтиёр Худоёрзода ҷаласаи навбатии Комиссияро баргузор намуд, ки дар он масоли марбут ба омодагӣ ва баргузории интихоботи президентии ба рӯзи 11 октябр таъингардида баррасӣ шуданд.

Бино ба иттилои дафтари матбуоти КМИР ҶТ, бо қарори Комиссия барои иштироки шаҳрвнадони Тоҷикистон, ки дар хориҷа кору зиндагӣ мекунанд, дар 29 кишвари хориҷӣ дар назди сафорат, намояндагӣ ва консулгариҳои Тоҷикистон 29 қитъаи интихоботӣ ташкил карда мешавад.

Қаблан бо қарори КМИР Тоҷикистон, мувофиқи меъёрҳои қонунгузории кишвар, барои баргузории интихоботи президентӣ дар ҷумҳурӣ 68 ҳавзаи интихоботӣ бо зикри қаламрав ва шумори пешакии интихобкунандагон таъсис дода шуда, ҳамаи онҳо рақам ва номгузорӣ карда шуданд.

Айни замон аз 7 ҳизби сиёсии Тоҷикистон то ин дам 4-тоаш - Ҳизби аграрӣ (пешвои ҳизб Рустам Латифзода), Ҳизби сотсиалистӣ (раиси ҳизб Абдуҳалим Ғаффоров), Ҳизби демократ (раиси ҳизб Саидҷаъфар Усмонзода) ва ҲИИТ (раиси ҳизб Рустам Раҳматзода) номзадҳояшонро ба мансаби президентӣ дар интихоботи моҳи октябр пешбарӣ намуданд.

Ёдрас мекунем, ки интихоботи навбатии президенти Тоҷикистон ба рӯзи 11 октябри соли равон таъин шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.