Шамсулло Тағоев,  сардори Маркази инноватсия ва устоди Донишгоҳи миллии Тоҷикистон (ДМТ) дар озмуни «Омӯзгори беҳтарин-2022» миёни омӯзгорони донишгоҳҳои Иттиҳоди Давлатҳои Мустақил (ИДМ) сазовори ҷой дуюм гардидааст.

Гуфта мешавад, ки мақолаи пешниҳоднамудаи ӯ барои чоп дар 2-юмин китоби байналмилалии «Омӯзгори беҳтарин-2022» интихоб гардид.

Тавре номбурда дар суҳбат ба АМИТ «Ховар» гуфтааст, барои ширкат намудан дар озмуни мазкур се моҳ пеш мақолаҳои худро пешниҳод намудааст.

«Дар нашри 2-юмин китоби байналмилалии «Омӯзгори беҳтарин-2022» аз Тоҷикистон мақолаи ман ва муҳаққиқи факултети информатикаи ДДБ ба номи Н.Хусрав Саёҳат Сафарова интихоб гардид. Аз ҷониби кумитаи тадорукот, ба ҷой дуюм, диплом ва медали сарисинагӣ сарфароз гардидам», - гуфтааст Тағоев.

Номбурда, инчунин яке аз иштирокчиёни фаъоли Мактаби тобистонаи байналмилалӣ мебошад, ки аз 4 то 9 июли соли равон дар Русия доир гардид.

Дар ин озмун аз Ҷумҳурии Тоҷикистон ду нафар: Шамсулло Тағоев аз ДМТ ва Саёҳат Сафарова – муҳаққиқи факултети информатикаи ДДБ ба номи Носири Хусрав интихоб гардида буданд.

Бояд гуфт, ки озмуни мазкур бо ташаббуси Ассотсиатсияи байналмилалии олимони ҷавон, (Қазоқистон) ва дастгирии Иттиҳодияи шахсони ҳуқуқии «Ҳаракати умумимиллии Бобек» доир гардид.

Дар Telegram, Facebook, Instagram, OK ва ВК бо мо бимонед.