Душанбе. 23-юми апрел. ОИ «Азия-Плюс» - Дар чаҳорчӯбаи ҳафтаи бахшида ба таҷлили ҷшни 90-умин солгарди таъсисёбии Созмони байнулмилалии меҳнат дар 182 кишвари узви созмон таҳти унвони «90 соли фаъолият ба хотири адолати иҷтимоӣ» чорабиниҳои гуногун баргузор мешаванд.

Чӣ тавре ки аз намояндагии СБМ дар Тоҷикистон ба ОИ «Азия-Плюс» хабар доданд, шурӯъ аз 21-уми апрел оид ба фаъолияти созмон дар радиову телевизион барномаҳо пахш гардида, намоишгоҳу ярмаркаҳои ҷойҳои кории холӣ доир карда мешаванд ва дар сатҳҳои гуногун муколамаву гуфтушунидҳои судманд сурат хоҳанд гирифт.

Бино ба иттилои манбаъ, дар чорабиниҳое, ки дар саросари ҷаҳон баргузор мешаванд, шарикони созмон – намояндагони ҳукуматҳо, корҷӯёну корфармоён, ташкилотҳои ғайриҳукуматӣ, намояндагони мардумӣ, аҳли ҷомеа ва олимону равшанфикрон ширкат хоҳанд варзид. «Дар чорабиниҳо нақши СБМ дар ҳалли мушкилоти рӯзмарра дар сатҳи минтақавӣ ва миллӣ мавриди баррасӣ қарор хоҳад гирифт», - афзуд манбаъ.