Душанбе. 23-юми апрел. ОИ «Азия-Плюс» - Дар зарфи се моҳи соли ҷорӣ дар Тоҷикистон 17 нерӯгоҳи нави хурди барқӣ ба истифода дода шуд.

            Муовини вазири энергетика ва саноати ҶТ Пӯлод Муҳиддинов дар нишасти хабарӣ изҳор дошт, ки ин нерӯгоҳҳо дар як шабонарӯз то 700 кВт нерӯи барқ истеҳсол карда, беш аз 400 оила ва 11 корхонаву муассисаро бо нерӯи барқ таъмин месозанд. «Айни замон бунёди боз 20 нерӯгоҳи хурд дар кишвар идома дошта, дар семоҳаи аввал 2 истгоҳи барқии бодӣ низ мавриди истифода қарор гирифт», - гуфт ӯ.

            П.Муҳиддинов гуфт, сарфи назар аз мухолифати баъзе кишварҳои ҳамсоя, сохтмони иншооти бузурги гидроэнегетикӣ идома ёфта, ҳукумати ҷумҳурӣ мунтазам маблағгузорӣ ба сохтмони нерӯгоҳи Роғунро афзоиш медиҳад ва 200 млн. сомонӣ маблағеро, ки барои соли равон ба ин иншоот пешбинӣ шудааст, сохтмончиён соли равон бояд азхуд кунанд.