Маҷлиси имрӯзаи ҳукумати Тоҷикистон таҳти раёсати президенти ҷумҳурӣ Эмомалӣ Раҳмон ба итмом расида, хадамоти матбуоти сарвари давлат танҳо дар бораи масъалаҳои баррасишуда дар он мухтасар маълумот медиҳад.

Интизориҳои эҳтимоли қабули ниҳоӣ дар бораи болоравии арзиши интернети мобилӣ маҳз дар ин ҷаласа, ҳамин тавр интизорӣ боқӣ монданд.

Ба сурати умум ба миён гузоштан ва баррасии масъалаи арзиши интернети мобилӣ дар ҷаласаи мазкур номаълум аст.

1/6

Бино ба маълумоти хадамоти матбуоти сарвари давлат, дар ҷаласа якчанд лоиҳаҳои қонунҳо баррасӣ ва ҳисоботи роҳбарони вазорату идораҳо дар бораи фаъолияташон шунида шуданд.

Нахуст “Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2019-2020” ҳисоботи Вазири рушди иқтисод ва савдо Неъматулло Ҳикматуллозода шунида шуд.

Дар бораи лоиҳаи конунҳои Тоҷикистон оид ба ворид намудани тағйиру иловаҳо ба Қонуни ҶТ “Дар бораи Буҷети давлатии Тоҷикистон барои соли 2019” ва “Оид ба ворид намудани тағйиру иловаҳо ба Қонуни ҶТ “Дар бораи дигар пардохтҳои ҳатмӣ ба буҷет” гузориши вазири молияи ҷумҳурӣ Файзиддин Қаҳҳорзода шунида шуд.

Ҳамчунин оид ба лоиҳаи қонуни ҶТ “Дар бораи таъмини оби нӯшокӣ ва рафъи обҳои партов” гузориши вазири энергетика ва захираҳои об Усмоналӣ Усмонзода, Оид ба лоиҳаи конуни ҶТ “Дар бораи таъмини аҳолӣ бо маҳсулоти хӯроквории ғанигардонидашуда” гузориши вазири тандурустӣ ва ҳифзи иҷтимоии аҳолӣ Насим Олимзода ва дар бораи Барномаи рушди саноати сабук дар Тоҷикистон барои давраи то соли 2022 гузориши вазири саноат ва технологияҳои нав Заробиддин Файзуллозода шунида шуд.

Гуфта мешавад, дар кори маҷлис ҳамчунин лоиҳаи қонуни ҶТ “Оид ба ворид намудани тағйиру иловаҳо ба Кодекси ҳуқуқвайронкунии маъмурии ҶТ” ва лоиҳаи қонуни ҶТ “Оид ба ворид намудани тағйироту илова ба қонуни Тоҷикистон “Дар бораи санҷиши фаъолияти субъектҳои хоҷагидор” баррасӣ карда шуд.

Лоиҳаҳои қонунҳои муҳокимашуда ва хулосаи ҳукумати Тоҷикистон “Дар бораи пешниҳоди хулосаи ҳукумати ҶТ ба лоиҳаи қонуни ҶТ “Дар бораи чарогоҳ” барои баррасӣ ба Маҷлиси намояндагони Маҷлиси Олии ҶТ ирсол карда шуд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.