Имрӯз, 26-уми апрел, Валерий Герасимов, сардори ситоди кулли артиши Русия ба Владимир Путин, раиси ҷумҳури ин кишвар гузориш дод, ки вилояти Курс аз низомиёни Украина пурра озод шудааст. Иддаое, ки мақомоти низомии Украина рад кард.

Валерий Герасимов гуфт, дар озод кардани вилояти Курск сарбозони Кореяи Шимолӣ низ саҳми назаррас гузоштаанд.

“Мехоҳам саҳми хоссаи сарбозони Ҷумҳурии Халқии Демократии Кореяро, ки тибқи Созишномаи ҳамкории стратегӣ байни кишварҳои мо дар озод кардани минтақаҳои марзии Курск аз нерӯҳои низомии Украина гузоштанд, таъкид мекунам”, - гуфтааст Герасимов.

Пештар Маскав ҳузури низомиён аз Куриёи Шимолиро ҳеҷ гоҳ эътироф накарда буд. Украина ва кишварҳои дигари ғарбӣ борҳо ба ҳузури беш аз 10 ҳазор низомии Куриёи Шимолӣ дар вилояти Курск ишора карда буданд.

Дар ҳамин ҳол, Ситоди кулли артиши Украина изҳороти Герасимов ба Путинро рад карда, гуфт, то ҳол дар Курск ҳудудҳои муайянро дар ихтиёр дорад ва меҷангад.

“Амалиёти дифоии артиши Украина дар минтақаҳои муайяни вилояти Курск идома дорад. Вазъ душвор аст, вале воҳидҳои мо вазифаҳои худро иҷро мекунанд ва бо истифода аз ҳама гуна аслиҳа, ҳамчунин тактикии мудофиаи фаъол, ба душман зарба мезананд”, - зикр мешавад дар изҳороти Ситоди кулли артиши Украина.

Бояд гуфт, артиши Украина ба вилояти Курск моҳи августи 2024 ҳуҷум кард. Онҳо тақрибан 1000 км мураббаро ишғол карданд. Он замон ҷониби Украина таъкид мекард, ки минтақаҳои ишғолкардааш дар Курск ҳангоми музокирот бо Русия бо заминҳои аз сӯйи Русия ғасбшудааш табодул хоҳад шуд. Аммо баъдан онро тадриҷан аз даст дод.

Дар Telegram, Facebook ва Instagram бо мо бимонед.