Дар чаҳорчӯби сафари давлатии президенти Ӯзбекистон Шавкат Мирзиёев ба Тоҷикистон рӯзҳои 18-19 апрел Протокол дар бораи ворид намудани тағйиру иловаҳо ба Созишномаи байниҳукуматӣ дар бораи алоқаи байналмилалии автомобилӣ аз 9 марти соли 2018 имзо карда шуд.
Тавре ки Вазорати нақлиёти ҷумҳурӣ хабар медиҳад, мувофиқи Протоколи имзошуда, гузариши транзитии воситаҳои нақлиёти боркаш тавассути қаламрави ҳарду давлат бе рухсатнома амалӣ карда хоҳад шуд.
“Низоми нав баъди тасвиби (ратификатсияи) Протокол аз ҷониби ҳарду давлат мавриди амал қарор мегирад”, - омадааст дар хабар.
Ба иттилои манбаъ, мутобиқи Созишномаи байниҳукуматӣ дар бораи алоқаи байналмилалии автомобилӣ, ки низ дар Душанбе дар ҷараёни нахустин сафари давлатии президенти Ӯзбекистон 9 марти соли 2018 ба имзо расида буд, ҳангоми интиқоли мунтазам ва ғайримунтазами мусофирон ва борҳо байни Тоҷикистону Ӯзбекистон, аз ҷумла тавассути транзит аз қаламрави онҳо, рухсатнома талаб карда мешуд.
“Сухан дар бораи ҳуҷҷате меравад, ки аз ҷониби мақомоти салоҳиятдори давлат дода мешавад ва он ба истифодаи воситаи нақлиёти автомобилӣ, ки дар қаламрави давлати дигар ба қайд гирифта шудааст, барои иҷрои ҳамлу нақли байналмилалии автомобилӣ ҳуқуқ медиҳад”, - шарҳ медиҳад Вазорат.
Бино ба маълумоти Вазорат, феълан, дар натиҷаи густариши ҳамкориҳо миёни Тоҷикистону Ӯзбекистон, ҳамасола тавассути қаламрави ду кишвар беш аз 1200 боркашонии транзитӣ амалӣ карда мешавад.
“Айни замон, ҳамлу нақли бор миёни Тоҷикистон, баъзе аз кишварҳои Осиёи Марказӣ ва Русия, аз ҷумла бо транзит тавассути қаламрави онҳо бидуни рухсатнома амалӣ карда мешавад, ки ин имкон медиҳад вақти интиқол ва хатари осебёбии борҳо хеле коҳиш ёбад”, - хабар медиҳад ин ниҳод.
“Ин тадбирҳо аз ҷониби ҳукумати Тоҷикистон бо мақсади ноил шудан ба ҳадафи стратегӣ – табдил додани ҷумҳурӣ ба кишвари транзитии минтақа андешида мешаванд”, - зикр мекунанд дар Вазорат.
Аввали моҳи феврал дар гузаргоҳи Фотеҳободи ноҳияи Мастчоҳ дар марз бо Ӯзбекистон даҳҳо “фура” (мошинҳои боркаши бузургҳаҷм) банд монда буданд. Азим Иброҳим, вазири нақлиёти Тоҷикистон дар шарҳи он изҳор дошта буд, ки сабаби асосӣ ба анҷом расидани муҳлати рухсатномаҳое, ки ронандагони тоҷик барои убури марз дастрас мекунанд.
Ӯ зикр карда буд, ки ин мушкил одатан охири моҳи январ сар мезанад, вақте ки муҳлати рухсатномаҳо ба охир мерасаду ҷониби Ӯзбекистон рухсатномаҳои навро ирсол мекунад.
“Баъди қабули рухсатномаҳо аз ҷониби Ӯзбекистон Вазорати нақлиёт ҳуҷҷатҳоро аз расмиёти дохилӣ мегузаронад ва ба ҷамъиятҳои боркашонӣ барои фурӯхтан ба ронандагон медиҳад”, - изҳор дошта буд вазири нақлиёт.
Қобили зикр аст, ки мошинҳои боркаши бузургҳаҷм аз Тоҷикистон тавассути 13 гузаргоҳи назоратӣ ба қаламрави Ӯзбекистон ворид шуда метавонанд. Гузаргоҳи “Фотеҳобод-Ойбек” дар ноҳияи Мастчоҳ яке аз гузаргоҳҳои асосӣ байни кишварҳо ба ҳисоб меравад.
Руcский