Кишоварзони тоҷик киштукори баҳориро дар майдони зиёда аз 395 ҳазор гектар анҷом доданд, ки ба ҳудуди 90% аз нақша баробар аст.

Тибқи пешгӯии Вазорати кишоварзии ҷумҳурӣ, ба сурати умум киштукори баҳорӣ имсол бояд дар майдони 440 ҳазору 727 гектар гузаронида шавад.

Дар Тоҷикистон мисли пешин бештар ба кишти пунбадона афзалият дода шуда, он зиёда аз 40%-и заминҳои киштро ишғол мекунад.

То 13 май дар ҷумҳурӣ дар 180 ҳазору 550 гектар пахта кишт шудааст, ки ба 97,1%-и нақша баробар аст. Кишти пунбадона ҳамагӣ дар 186 ҳазор гектар ва 432 ҳазор тонна ҳосили пахта гирифтан аз он ба нақша гирифта шудааст.

Қобили зикр аст, ки соли 2023 кишоварзони Тоҷикистон 411,9 ҳазор тонна (95,8%-и нақша)  ҳосили пахта гирифтанд, ки 344,4 ҳазор тоннаи он (83,6% аз ҳосили ҷамъоваришуда) ба корхонаҳои коркарди пахта супурда шудааст.

Бо сабаби паст будани нархҳои харид фермероне, ки барои нигаҳдорӣ ҷой доранд, бо умеди болоравии нархҳо тасмим гирифтаанд, ки 16,4% аз ҳосилро бо худ нигоҳ доранд.

Корхонаҳои коркарди пахта соли гузашта ба кишоварзон барои 1 кило пахта 6-7 сомонӣ нарх пешниҳод намуданд, ки ин ба арзиши аслии маҳсулот баробар буд. Дар натиҷа аксари фермерони машғул ба пахтакорӣ зиён бардоштанд.

Тибқи ҳисобу китоби истеҳсолкунандагон, хароҷоти парвариши пахта дар майдони 1 гектар аз 15 ҳазор сомонӣ ва зиёдтар аз онро ташкил медиҳад.
Бо ҳосилнокии 20-25 сентнер аз 1 гектар дар шароити Тоҷикистон нархҳои харид ба пахта хароҷоти фермеронро бароварда намекунад.
Сурат: fergana.agency

Дар зинаи дуюм аз лиҳози афхалият зироатҳои ғалладона қарор дошта, дар давраи баҳор ин зироатҳо дар майдони зиёда аз 96 ҳазор гектар кишт шудаанд. Дар майдони 53 ҳазор гектар сабзавоту полезиҳо кишт шудаанд.

Картошка дар майдони 25,5 ҳазор гектар шинонида шуда, 40 ҳазор тонна гирифтани ҳосили он ба нақша гирифта шудааст.

Қобили зикр аст, ки мавсими кишти зироатҳои кишоварзӣ ҳоло идома дорад.

Ҳамзамон ҷамъоварии ҳосили зироатҳои тезпаз ё барвақтӣ низ ҷараён дорад.

Имрӯзҳо ҷамъоварии ҳосили қулфинай (клубника), гелос, зардолу, пиёз идома дошта, ба наздикӣ дар бозорҳо бодиринги мавсими имсола, картошка, сирпиёз, себҳои тезпазак, олу ба фурӯш бароварда мешаванд.

Ба сатҳи ҳосилнокии сабзавоту мева ва зироатҳо обёрӣ таъсир мерасонад, ки имсол дар баъзе минтақаҳои камбуди он эҳсос мешавад.

Пас аз боришоти зиёд идораҳои таъмини об барои таъмири ҷойҳои осебидаи ҷӯйбору каналҳо фурсат наёфта, дар натиҷа об то сари заминҳо намерасад ва ҳосили деҳқонон талаф меёбад.

Дар Telegram, Facebook, Instagram, OK ва ВК бо мо бимонед.