5 март вақте ба дидори бинокорони аз гунбази масҷиди бузурги Душанбе афтода рафтем, онҳо худро хуб ҳис мекарданд ва бо мо чанд дақиқа суҳбат намуданд. Онҳо мегӯянд, ки пас аз шифо ёфтан боз ба кори худ идома медиҳанд.

Зубайдуллои Аввал, сокини 29-солаи ноҳияи Данғараи Вилояти Хатлон, ки дар пайи ин садама бо ҷароҳатҳои гуногун дар шуъбаи ҷарроҳиҳои асаби Маркази миллии тиббии Тоҷикистон бистарӣ гардидааст, гуфт, ки ҳоло худро хеле хуб ҳис мекунад.

- Ростӣ, бовар надоштам, ки зинда мемонам, аммо шукр, имрӯз вазъам хеле хуб аст. Фикр мекунам инояти Худо буд, вагарна аз он баландие, ки афтодам, зинда мондан душвор аст.

Зубайдуллои Аввал гуфт, ки бештар аз ду сол аст, дар ширкати эронии “Дима Пӯшиш”, ки ба сохтмони масҷид бузурги Душанбе машғул аст, ҳамчун кафшергар, фаъолият менамояд.

Ӯ рӯзи рух додани ҳодисаро чунин ба хотир овард:

- Субҳ, вақте корро оғоз мекунем, аввал асбобҳои кориамонро ба мавзеи кориамон мебарорем. Рӯзи рух додани воқеа низ мо асбобҳои кафшеркуниро ба боло бароварда, ба кор омодагӣ медидем, ки пояи зина (строительные леса) шикаст ва ба замин афтодем.

- Оё техникаи бехатариро риоя намекардед? Камарбанд (тасма) надоштед?

- Ростӣ, то ин замон чанд нафар дар ин бора пурсиданд. Ҳар рӯз мо аз тасма истифода мекардем, аммо субҳ, вақти оғози кор, табиӣ, ки то мавзеи кор бе тасма мебароем. Аввал асбобҳоямонро бароварда, ҷо ба ҷо мекунем, ба қувваи барқ пайваст менамоем, баъд тасмаро баста, корро оғоз мекунем. Зинапоя дар ҷараёни баровардани асбобҳои корӣ шикаст, ки мо он замон тасма набаста будем.

Агар тасма ҳам мебастем, фикр мекунам, фоида надошт. Зеро тасмаро дар куҷо мебандем? Боз дар ҳамон зинапоя.

- Зинапоя кай гузошта шуда буд?

- Ба фикрам соли гузашта зинапояро гузошта буданд.

- Кулоҳ ё сарпӯш надоштед?

- Сарпӯш ҳам дорем, аммо чун корро оғоз накарда будем, ҳоло напӯшида будем. Мо кафшергарон сарпӯши махсус дорем, онро пеш аз кор мепӯшем.

Фарҳод Гулов, сокини 23-солаи ноҳияи Данғара низ дар ин шуъба бистарӣ гардидааст. Ӯ ҳам дар ширкати “Дима Пӯшиш” фаъолият мекунад.

Фарҳод Гулов мегӯяд, ки баландии мавзеи кори онҳо тахминан 44 - 48 метр аст.

- Он ҷо чанд қабат аст. Мо дар баландии 44 метр қарор доштем, Зубайдулло тахминан 4 метр болотар аз мо буд. Вақте пояи зина шикаст, бо ҳамон чӯбу оҳан якҷо, болои ҳам ба замин афтодем.

Бинокорони ҷароҳатбардошта мегӯянд, ки намояндаи ширкат пайваста аз ҳолашон хабар мегиранд ва тамоми хароҷоти табобатро пардохт менамоянд. Аммо то имрӯз онҳо ягон хел ҷубронпулӣ нагирифтаанд.

Як намояндаи ширкати “Дима Пӯшиш”, ки аз зикри номаш худдорӣ кард, гуфт, ки ширкат аз ҳоли бинокорони ҷароҳатбардошта ҳамеша хабардор аст ва хароҷоти табобатро пардохт менамояд. Ӯ гуфт, ки ин бинокорон баъди аз беморхона ҷавоб шудан як моҳи дигар истироҳат мекунанд ва ширкат маоши онҳоро дар шакли пурра пардохт менамояд.

Худи бинокорони ҷароҳатбардошта мегӯянд, ки пас аз шифо ёфтан, боз ба кори худ дар ин масҷид идома медиҳанд. Онҳо гуфтанд, ки аз маоши худ қаноатманданд.

Суҳробшо Иқболов, сокини 33-солаи ноҳияи Дарвози ВМКБ дар ширкати “Сомон-Сохтмон” фаъолият менамояд. Ӯ низ дар шуъбаи ҷарроҳии асаб бистарӣ гардидааст. Суҳробшо мегӯяд, ки намояндагони ширкати “Сомон-Сохтмон ” аз ҳолаш хабар мегиранд ва тамоми пардохти табобатро ба зимма гирифтаанд.

Дар ҳамин ҳол, Нуралӣ Қурбонов, мудири шуъбаи ҷарроҳии асаби Маркази миллии тиббии Тоҷикистон дар суҳбат бо “Азия-Плюс” гуфт, ки вазъи саломатии ҳар се бинокори масҷид, ки дар ин шуъба бистарӣ гардидаанд, хуб аст ва рӯзҳои наздик онҳо ба хонаҳои худ ҷавоб дода мешаванд.

Қурбоншо Элчиев, сокини 38-солаи ноҳияи Дарвоз ягона бинокорест, ки то ҳол вазъи саломатиаш вазнин арзёбӣ карда мешавад. Ӯ рӯзи 1-уми март аз шуъбаи эҳё ба шуъбаи ҷарроҳии асаб интиқол ёфта буд. Он замон табибон вазъи саломатии ӯро муътадил арзёбӣ карда буданд.

Дирӯз, вақте мо ба дидори бинокорон рафтем, табибон гуфтанд, ки вазъи саломатии Қурбоншо Элчиев боз бад шудааст ва ӯро ба шуъбаи эҳё интиқол додаанд. Яке аз табибони шуъбаи эҳё гуфт, ки вазъи саломатии ӯ хеле вазнин аст.

Гуфтан ба маврид аст, ки дар пайи ин ҳодиса бинокор Давлатшо Юсупов – сокини 60-солаи ноҳияи Рӯдакӣ, ки чанд рӯз дар шуъбаи эҳё қарор дошт, вафот кард.

Се нафари дигаре, ки ҷароҳатҳои сабук бардошта буданд, дар шуъбаи шикастабандӣ бистарӣ гардида, як нафар дар рӯзи рух додани ҳодиса аз бистарӣ гардидан худдорӣ кардааст.

Дар робита ба ин ҳодиса, прокуратураи шаҳри Душанбе бо моддаи 190 (Вайрон кардани қоидаҳои бехатарии корҳои кӯҳӣ,сохтмон ва дигар корҳо)-и Кодекси ҷиноии ҶТ парвандаи ҷиноӣ боз кардааст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.