Душанбе. 18-уми июл. ОИ «Азия-Плюс» - «Баҳори имсола ва хушксолӣ ба сабзиши мууофиқи меъёри кишти пахта мусоидат накард», - изҳор дошт дар нишасти матбуотӣ муовини вазири кишоварзии ҶТ Маҳмуд Қодиров.

  Ба гуфтаи ӯ, сабзиши мувофиқи меъёри ниҳоли пахта то санаи 16-уми июли соли равон дар майдони 209 ҳазору 270 гектар (88 фоиз) таъмин шудааст. Дар вилояти Суғд он дар майдони 65,5 фоиз, Хатлон 96,7 фоиз ва ноҳияҳои тобеи марказ 100 фоиз мувофиқи меъёр сабзидааст. «Деҳқонон соли равон ният доранд, дар майдони 253 ҳазору 752 гектар кишти пахта гузаронанд, вале ҳамагӣ дар майдони 238 ҳазору 343 гектар кишт гузаронида шуд», - баён дошт вай.

«Дар вилояти Суғд, ки 70 фоизи заминҳо ба таври сунъӣ обёрӣ карда мешаванд, вазъ аз ҳама бештар ногувор аст, - идома дод ӯ. - Ба иллати саривақт омода насохтани пойгоҳҳои обкашӣ ба миқдори 220 млн. метри мукааб камшавии оби обанбори Қайроққум обмонии пахтазорҳо ба муддати тӯлонӣ кашол ёфт».

Илова бар ин, муовини вазир хабар дод, ки барои ғизодиҳӣ бо нурӣ соли ҷорӣ ба Тоҷикистон 250 ҳазор тонна нуриҳои минералӣ зарур аст, вале корхонаи «Тоҷиказот» ҳамагӣ 54 ҳазору 658 тонна нурӣ овардааст.