Ҷӯрабеки Мелиқул, сокини 19-солаи ноҳияи Рӯдакӣ, ки ҳамагӣ 13-рӯз пеш аз зиндон ба озодӣ баромада буд, дубора бо гумони дуздӣ аз ҷониби пулиси Душанбе дастгир шудааст. Ӯ қаблан ҳам бо ҷурми дуздӣ адои ҷазо мекард. Дар ин бора Раёсати Вазорати корҳои дохилӣ дар пойтахт хабар медиҳад.

Ба гуфтаи манбаъ, тафтишоти пешакӣ 7 далели даст доштани Ҷӯрабеки Мелиқулро дар ҷиноятҳои дуздӣ муайян кардааст.

“Гумонбаршаванда дар ҳудуди шаҳри Душанбе ва ноҳияи Рӯдакӣ телефонҳои мобилӣ, дучарха ва дигар ашёҳои арзишманди шаҳрвандонро дуздида, аз фурӯши он маблағ ба даст меовард”, - менависад РВКД дар Душанбе.

Ҳоло гумонбаршаванда дар ҳабси пешакӣ қарор дошта, оид ба кирдорҳои ҷиноятии ӯ тафтишот идома дорад. Маълум нест, ки бар зиддаш парвандаи ҷиноятӣ боз гардидааст ё не.

Зимнан, моддаи 244, қисми 2, банди “а”-и Кодекси ҷиноятӣ, ки ҷазои дуздии такрориро пешбинӣ мекунад, аз 75 ҳазор то 150 ҳазор сомонӣ (аз 1 ҳазор то 2 ҳазор нишондиҳанда барои ҳисобҳо) ҷарима ё аз 2 то 5 соли ҳабс пешбинӣ мекунад.

Ёдовар мешавем, ки хабари ба дуздӣ даст задани ҷавонон бори аввал нест, ки расонаӣ мешавад, вале иттилои баъди зиндон дубора ба дуздӣ даст задан аз хабарҳоест, ки камтар расонаӣ мегардад.

Як пажӯҳиш нишон додааст, ки маҳбусони собиқ бинобар сабаби бо ҷойи кор таъмин нашудан дигарбора даст ба ҷиноят мезананд. Коршиносон бар ин назаранд, ки чунин вазъ метавонад онҳоро барои дигарбора содир кардани ҷиноятҳо водор созад.

Дар Telegram, Facebook ва Instagram бо мо бимонед.