Душанбе. 7-уми июл. ОИ «Азия-Плюс» - Рӯзи ҷумъаи ҳафтаи гузашта дар додгоҳи ноҳияи Шоҳмансури пойтахт қазияи додгоҳии ду роҳбари Ҳизби Демократии Тоҷикистон (ҲДТ) мавриди баррасӣ қарор гирифт.

Раиси расман эътирофшудаи ҲДТ Масъуд Собиров аз роҳбари яке аз се ҷиноҳи ҳизб Саидҷаъфар Исмонов даъво дорад, ки барои чун раиси ҳизб худро муаррифӣ карданаш, ба сифати ҷуброни зарари маънавӣ ба ӯ 150 ҳазор сомонӣ маблағ пардохт кунад.

Дар аризаи даъвогиаш М.Собиров аз мақолаҳои С.Исмонов дар ҳафтаномаи «Фараж» ёдовар мешавад, ки дар онҳо ӯ худро раиси ҳизб номидааст.

Дар ҳамин ҳол, С.Исмонов мегӯяд, ки даъвои М.Собиров «ҳеҷ асосе надорад». «Аввал, М.Собировро чун роҳбари ҳизб танҳо мақомоти ҳукумати расмӣ эътироф мекунанд, на раёсати ҲДТ, - изҳор дошт ӯ. - Дуввум, ба сифати даъвогар ӯ ба толори додгоҳ ҳозир нашудааст ва ҳузури рӯзноманигоронро дар толор манъ карданд, ки ин ба гумони ғаразнок будани баррасии даъво мебарад».  

Имрӯз дар додгоҳи ноҳияи Шоҳмансури шаҳри Душанбе бояд      қарори ҳалномаи додгоҳӣ бароварда шавад.