Шарафҷон Насриддинов, як сокини ноҳияи Рӯдакӣ, ки бо тахаллуси Қорӣ Раҷабалӣ маъруф гаштааст, бо гумони қаллобӣ боздошт ва бар зиддаш парвандаи ҷиноятӣ ифтитоҳ шуд. Дар ин бора "Милитсия ҳомии ҷомеа"-и ВКД хабар медиҳад.

Ба гуфтаи манбаъ, "Қори Раҷабалӣ ба ҳар хонае бо мақсади дуохони мерафт, кирдори ношояме содир мекард".

Ӯ то ин дам се занро, аз ҷумла як ноболиғро ба никоҳи худ даровардааст ва ба гуфтаи ВКД рӯзгорашро аз ҳисоби занонаш пеш мебурдааст.

"Қорӣ Раҷабалӣ дар маҳфилҳо ба қавле мардумро панду андарз, аз инсофу адл гуфта, худ ғуломи нафс шудааст. Ӯ ҳатто ҳамсарони ёру дустони худро ба никоҳаш даровардааст", - гуфта мешавад дар ахбори ВКД.

Ӯ дар ягон ҷо таҳсили динии расмӣ нагирифта, вале дар масчиди “Қазоқонӣ” ноҳияи Сино ҳамун қорӣ фаъолият доштааст.

Худи гумонбаршаванда дар навор тасдиқ мекунад, ки бо ивази маблағ дуохонӣ мекардааст, вале ба никоҳи худ даровардани се занро "аз нигоҳ ислом" дуруст мехонад.

Ҳоло нисбати  Шарафҷон Насриддинов бо моддаи 247, қисми 2-и Кодекси ҷиноятӣ парванда боз шудааст.

Тафсилот дар ахбори ВКД аст.

Дар Telegram, Facebook ва Instagram бо мо бимонед.