Бо пешниҳоди раиси падлатаи поёнии парлумони кишвар Шукурҷон Зуҳуров, иҷлосияи сеюми Маҷлиси намояндагони Маҷлиси Олии ҶТ даъвати чорум, ки имрӯз дар шаҳри Душанбе ба кор шурӯъ кард, «иҷлосияи қабули қонунҳои босифат» эълон шуд.

Зимни суханронӣ дар ҷаласаи нахустини пас аз таътил Зуҳров қайд кард, ки дар ҷараёни иҷлосияи мазкур, ки то 30-юми июни соли оянда идома меёбад, намояндагони мардумӣ ба қонунҳои қабулмешуда таваҷҷӯҳи хосса зоҳир карда, мутобиқати онҳо ба меъёрҳои байнулмилалиро тақозо хоҳанд намуд.

Дар идома раиси палатаи поёнии парлумон таъкид кард, ки айни замон дар парлумон беш аз 40 лоиҳаҳои қонунҳо барои баррасӣ қарор дорад. «Дар сурати зарурат ман пешниҳод мекунам, ки ташхисҳои илмиву иқтисодӣ, зиддикоррупсионӣ ва забонии ин лоиҳаҳои қонунҳо доир карда шавад», - гуфт ӯ.

Зуҳуров зикр кард, ки ба вакилони парлумон зарур аст, ба қабули як силсила лоиҳаи қонунҳо дар бораи энергетика, молия, андоз ва иқисод таваҷҷӯҳи бештар зоҳир созанд. Дар ҳамин ҳол, Зуҳуров қайд кард, ки дар муддати идомаи иҷлосия намояндагони мардумӣ бояд бо интихобкунандагони худ доимо дар тамос бошанд, то ки аз мушкилоту пешниҳодоти онҳо огаҳӣ дошта бошанд.

Рӯзномаи ҷаласаи кунунӣ аз 16 масоил иборат аст. Миёни онҳо масоили ворид сохтани тағйироту илова ба қонунҳои ҶТ дар бораи буҷети давлатии соли 2011, реклама, мақомоти милиса ва тасдиқсозии як қатор созишномаҳои байниҳукуматӣ ҷой доранд.