Дар Олмон бар зидди 7 зодаи кишварҳои Осиёи Марказӣ бо иттиҳоми ташкили гурӯҳи террористӣ, иштирок дар фаъолияти он ва пуштибонӣ аз созмони террористии “Давлати исломӣ” (ДОИШ) парванда боз гардид.

Ба иттилои хабаргузории DW, муттаҳамон панҷ нафар аз Тоҷикистон, як шаҳрванди Қирғизистон ва як шаҳрванди Туркманистон мебошанд, ки баҳори соли 2022 аз Украина ба Олмон омадаанд ва моҳи июли соли 2023 дар иёлати федеролии Рейн-Вестфалияи Шимолӣ боздошт шудаанд. Ҳангоми боздошт онҳо аз 20 то 46 сола буданд. Аммо ҳуввияти боздоштшудагон ошкор намешавад.

Зикр мегардад, ки бо гузашти нӯҳ моҳ, 24-уми апрел, додситонии федеролии Карлсруэ алайҳи онҳо расман айб эълон кард. Аз ин ҳафт нафар шаш нафар ба таъсиси гурӯҳи террористӣ дар дохили Олмон ва ҳамчунин пуштибонӣ аз созмони террористии “Давлати исломӣ” (ДОИШ) муттаҳам мешаванд. Илова бар ин, панҷ нафари боздоштшуда ба нақзи қонуни тиҷорати хориҷии Олмон муттаҳам мешаванд. Ба гуфтаи додситонӣ, онҳо барои ДОИШ пул ҷамъоварӣ карда, чанд ҳазор евро ба исломгароён дар хориҷ интиқол додаанд.

Дар Telegram, Facebook, Instagram бо мо бимонед.