Вазорати мудофиаи Русия бобати пешгирии вуруди ҷангиён аз музофотҳои шимолии Афғонистон ба қаламрави иттифоқчиён дар СААД дар Осиёи Марказӣ тадбирҳо меандешад, изҳор дошт вазири мудофиаи Русия Сергей Шойгу.

Тавре РИА Новости менависад, ин изҳорот аз ҷониби Сергей Шойгу зимни суханрониаш дар машварати вазирони мудофиаи кишварҳои узви Созмони ҳамкории Шанхай дар Пекин садо додааст.

«Бо ин мақсад омодагии ҷангии пойгоҳҳои низомиро дар Тоҷикистон ва Қирғизистон тақвият медиҳем, онҳоро бо силоҳи муосир ва техникаи ҳарбӣ муҷаҳҳаз мегардонем. Дар таҳкими имконоти ҷангии нерӯҳои ҳарбӣ  ва тарҳрезии истифодаи муштараки онҳо ба шарикон дар минтақа кумак мекунем», - қайд кардааст Шойгу.

Вазири мудофиаи Русия хотиррасон кардааст, ки моҳи марти соли равон дар Тоҷикистону Қирғизистон машқҳои зиддитеррористии фармондеҳӣ-ситодӣ гузаронида шуданд.

«Моҳи сентябр бо ҷалби сохторҳои гуногуни қудратӣ баргузории тамрини муштараки «Иссиқкӯл - Зиддитеррор-2018» дар назар буда, моҳи октябр бо нерӯҳои дастаҷамъонаи СААД як қатор машқҳо доир мегарданд. Онҳо аз рӯи нақшаи ягона пайдарҳам дар Қазоқистон, Қирғизистон, Русия ва Тоҷикистон барпо мешаванд», - иброз доштааст ӯ.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.