Маблағи умумии сармояи қарзии низоми бонкӣ ва ташкилотҳои маблағгузории хурд дар соҳаҳои асосии иқтисоди Тоҷикистон ба ҳолати 1 октябри соли равон беш аз 9,2 млрд. сомониро ташкил додааст.

Нишондиҳандаи мазкур нисбат ба ҳамин давраи соли гузашта 597 млн. сомонӣ ё худ 6,9% зиёд мебошад.

Тибқи маълумоти фаврии Бонки миллии Тоҷикистон (БМТ), дар сохтори қарзҳо 24% ба корхонаҳои давлатӣ рост меояд. Ин корхонаҳо айни замон дар ҳаҷми зиёда аз 2,2 млрд. сомонӣ қарзҳоро аз худ мекунанд.

Вазни қиёсии корхонаҳои хусусии тиҷоратӣ дар сандуқи қарз 24,8% ва корхонаҳои кишоварзӣ 4,7%-ро ташкил медиҳад.

Ба ҳиссаи шахсони алоҳида – 23,5% ва соҳибкорон – 19,9% рост омада, боз 3,1%-и қарзҳо зери мафҳуми “дигарҳо” зикр шудааст.

Дар сохтори қарзҳо беш аз 3,7 млрд. сомонӣ қарзҳои кӯтоҳмуддат ва наздики 5,5 млрд. сомонӣ дарозмуддат мебошанд.

Қарзҳо бо пули миллӣ дар ҳаҷми 4,7 млрд. сомонӣ ва асъори хориҷӣ ба маблағи зиёда аз 4,5 млрд. сомонӣ дода шудаанд.

Бино ба маълумоти БМТ, ҳиссаи қарзҳои ғайрифаъол (батаъхирафтода) дар ҳаҷми умумӣ 26% ва шумори қарздорон 465 ҳазор нафарро ташкил медиҳад.

Қобили зикр аст, ки қарзҳои ғайрифаъол сабабгори аслии буҳрони бонкӣ дар ҷумҳурӣ шуморида мешаванд.

Раисҷумҳур Эмомалӣ Раҳмон моҳи майи соли ҷорӣ дар вохӯрӣ бо дар вохӯрӣ бо кормандони соҳаҳои молия, андоз, гумрук ва бонкдории кишвар изҳор дошт, ки дар баъзе мавридҳо масъулини бонкҳо ба азонихудкунии маблағҳои пулӣ даст зада, ба шахсони наздики худ бидуни таъмини гарав ва ғайриқонунӣ қарзҳои бонкӣ додаанд.

Сарвари давлат таъкид дошта буд, ки дар аксари мавридҳо шахсони қарзгиранда аз беназоратӣ ва бепарвоии комиссияи нархгузорӣ ва масъулони бонк истифода карда, амволи ночизро бо мақсади минбаъд ба пул табдил додан бо нархи гарон ба гарав мондаанд.

Ба гуфтаи ӯ, ба сифати гарав амволе қабул шудааст, ки арзиши аслии он ба таври сунъӣ аз арзиши бозорӣ чандин баробар баланд нархгузорӣ шудааст.

“Ин ҳолат ба фурӯши саривақтии амволи гарав монеа гардида, минбаъд барои мушкилситон шудани қарз замина гузоштааст”, - изҳор дошт он замон раисҷумҳур.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.