Имрӯз, 9-уми август, Эмомалӣ Раҳмон, Президенти Тоҷикистон бо мақсади шиносоӣ аз раванди корҳои сохтмони Неругоҳи барқи обии Роғун ба шаҳри Роғун сафар кард.

Тавре дафтари матбуоти раисҷумҳури кишвар хабар медиҳад, .Эмомалӣ Раҳмон ва сарвазири кишвар Қоҳир Расулзода дар маркази шаҳри Роғун нахуст бо ҷараёни корҳои азнавсозии роҳи мошингарди "Роғун-Обигарм-Нуробод" ва лоиҳаи сохтмони роҳи автомобилгард аз Неругоҳи барқи обии Роғун то Неругоҳи барқи обии Шӯроб шинос шуданд.

Ба итилои манбаъ, сохтмони роҳи автомобилгард аз Неругоҳи барқи обии Роғун то Неругоҳи барқи обии Шӯроб моҳи октябри соли ҷорӣ оғоз гардида, дарозии умумии лоиҳавӣ 9,8 километрро ташкил медиҳад.

Тибқи лоиҳа дар роҳи автомобилгард аз НБО Роғун то Неругоҳи барқи обии Шӯроб як пул бо дарозии 1593 м мавҷуд буда, роҳи мазкур ба категорияи чоруми роҳсозӣ мутобиқ гардонида мешавад.

Роҳи автомобилгарди Роғун – Обигарм - Нуробод аз ду хати ҳаракат иборат буда, паҳнои стандартии он аз 12 то 15 метр ва канораҳои ду тараф ба 2,5 метр баробар мегарданд.

Дар Telegram, Facebook, Instagram, OK ва ВК бо мо бимонед.