Дар Тоҷикистон моҳи феврали соли равон қонуни соҳибкории иҷтимоӣ қабул гардид. Ин қонун ба соҳибкороне, ки гурӯҳҳои осебпазири аҳолиро дастгирӣ мекунанд, сабукиҳои андозӣ ва дигар имтиёзҳои давлатӣ пешбинӣ кард. Вале худи соҳибкорон мегӯянд, бо гузашти 7 моҳ ҳеҷ тағийроте дар фаъолияти онҳо ба назар намерасад. 

Яке аз ин ташкилотҳо, созмони ҷамъиятии “Ирода” аст, ки ба қишри осебпазири аҳолӣ, кӯдакони дорои аутизм кӯмак мекунад.

“Мувофиқи қонуни қабулшуда, 50% фоидаи бадастомада бояд дубора ба фаъолияти оинномавии ташкилот сармоягузорӣ шавад. Дар “Ирода” бошад, имрӯз 100% даромад дубора сармоягузорӣ мешавад. Гарчанд қонун фаъолияти моро, ки аллакай амалкунанда аст, пуштибонӣ кард, вале дар амал барои ТҶ “Ирода” ягон тағйироти куллӣ ворид накард”, - гуфт Лола Насриддинова, директори ТҶ "Ирода".

Аз Кумита давлатии сармоягузорӣ ва идораи амволи давлатии Тоҷикистон сабаби то ҳол дар амал татбиқ нагардидани имтиёзҳои дар қонун пешбинишударо омода набудани заминаи арзёбии соҳибкории иҷтимоӣ ва “Феҳристи бақайдгирии субъектҳои соҳибкории иҷтимоӣ” гуфтанд.

Аз ин ниҳод гуфтанд, интизор меравад, то як моҳи оянда феҳристи субъектҳо ва заминаи арзёбии соҳибкории иҷтимоӣ омода шавад.

Собир Вазиров, намояндаи Кумитаи андоз дар нишасти матбуотии тобистони соли равон гуфт, то имрӯз ба кумита барои бақайдгирии соҳибкории иҷтимоӣ касе муроҷиат накардааст.

Дар ҳолати татбиқ гардидани қонун, соҳибкорони иҷтимоӣ аз имтиёзҳои гуногун бархурдор мешаванд. Ин аз имтиёзи андозӣ ва сабукиҳо ҳангоми гирифтани грантҳо ва ғайра иборат мебошад.

Дар Telegram, Facebook ва Instagram бо мо бимонед.